Իրանի ԱԳ նախարար Հոսեյին Ամիր Աբդոլլահիանը հեռախոսազրույց է ունեցել ՄԱԿ-ի գլխավոր քարտուղար Անտոնիո Գուտերեշի հետ։
ISNA-ի փոխանցմամբ՝ հեռախոսազրույցը կայացել է ՄԱԿ-ի գլխավոր քարտուղարի նախաձեռնությամբ։
Զրույցի ընթացքում քննարկվել և մտքեր են փոխանակվել փոխադարձ հետաքրքրություն ներկայացնող որոշ հարցերի շուրջ, այդ թվում՝ միջուկային զենքի չտարածման պայմանագրի և պատժամիջոցների վերացման շուրջ բանակցությունների գործընթացի շուրջ։
Աբդոլլահիանն իր մտահոգությունն է հայտնել, որ Միջուկային զենքի չտարածման պայմանագրի վերջին համաժողովի նախագահը կողմնակալ դիրքորոշում է որդեգրել և հրաժարվում է նախորդ համաժողովների բոլոր ձեռքբերումներից։
«ԱՄՆ-ն արձագանքել է ԻԻՀ-ի առաջարկներին, և այժմ իմ գործընկերները քննում են այն։ Մենք ունենք լուրջ և իրական կամք՝ հասնելու ամուր և տևական համաձայնության և գործնականում դրսևորել ենք այդ կամքը»,- նշել է Աբդոլլահիանը՝ անդրադառնալով Իրանի միջուկային պատժամիջոցների վերացման բանակցություններին:
Անտոնիո Գուտերեշն էլ, ընդգծելով միջուկային զենքի չտարածման մասին պայմանագրում կոնսենսուսի անհրաժեշտությունը, վստահեցրել է, որ կուսումնասիրի և ուշադրություն կդարձնի Իրանի մտահոգություններին։
Գուտերեշը դրական է գնահատել իրանական կողմի ջանքերն ու կառուցողական դիրքորոշումները և հույս հայտնել, որ Վիեննայի բանակցությունները կավարտվեն բավարար արդյունքով։
Հետևեք մեզ տելեգրամում
