Լաչինի միջանցքի նոր ճանապարհը, որը Լեռնային Ղարաբաղը կապում է Հայաստանի հետ, կսկսի գործել 2023 թվականի ապրիլի 1-ից։ Այս մասին ՌԻԱ Նովոստիի հետ զրույցում հայտնել է ՌԴ ԱԳՆ-ի ԱՊՀ երկրների չորրորդ դեպարտամենտի տնօրեն Դենիս Գոնչարը, փոխանցում է Sputnik Armenia-ն:
«Վերջին ամսվա ընթացքում ձեռնարկած ջանքերի գլխավոր արդյունքն այն էր, որ ընդհանուր փոխըմբռնում է եղել, կապված նրա հետ, որ Լաչինի միջանցքով նոր ճանապարհը կսկսի գործել 2023 թվականի ապրիլի 1-ից։ Միևնույն ժամանակ օգոստոսի 30-ից երթևեկությունն իրականացվում է ժամանակավոր ճանապարհով` շրջանցելով Լաչին քաղաքն ու այլ բնակավայրերը, որոնք գտնվում են միջանցքի հին մայրուղու անվտանգության գոտու սահմաններում», – ասել է դիվանագետը։
Նա նշել է, որ հայկական և ադրբեջանական կողմերի միջև պայմանավորվածությունների արդյունքում և ՌԴ խաղաղապահ զորախմբի հրամանատարության հետ համաձայնեցմամբ օգոստոսի 24-ին ավարտվել էր միջանցքի հին մայրուղու անվտանգության գոտու սահմաններում գտնվող բնակավայրերի բնակիչների վերաբնակեցումը։
«Առանցքային նշանակություն ունի այն, որ միջանցքի շահագործման ռեժիմը չի փոխվի։ Ռուս խաղաղապահները տեղափոխվել են ժամանակավոր ճանապարհ, իսկ մինչև 2023 թվականի ապրիլի 1-ը կտեղափոխվեն նոր երթուղու տարածք», – վստահեցրել է Գոնչարը։
Ըստ նրա` և՛ Բաքուն, և՛ Երևանը ելնում են նրանից, որ Լաչինի միջանցքի շուրջ բոլոր հարցերի կարգավորումը պետք է իրականացվի 2020 թվականի նոյեմբերի 9-ին ՌԴ–ի, Հայաստանի և Ադրբեջանի առաջնորդների միջև կնքած հայտարարության դրույթների համախատասխան։
Հետևեք մեզ տելեգրամում
