Գրեթե մեկ տասնամյակ տևող դադարից հետո տեղի է ունեցել Իսրայելի վարչապետի թեկնածու Բենիամին Նեթանյահուի և Թուրքիայի նախագահ Ռեջեփ Էրդողանի հեռախոսազրույցը: Զրուցակիցները համաձայնել են միասին աշխատել՝ Իսրայելի և Թուրքիայի հարաբերություններում «նոր դարաշրջան» բացելու համար:
Ինչպես հաղորդում են իսրայելական ԶԼՄ-ները, հեռախոսազրույցը տևել է 12 րոպե: Նեթանյահուն ցավակցություն է հայտնել Էրդողանին Ստամբուլում տեղի ունեցած ահաբեկչության առնչությամբ և առաջարկել Իսրայելի աջակցությունն ահաբեկչության դեմ պայքարում:
Իր հերթին Էրդողանը ցավակցություն է հայտնել Նեթանյահուին Իսրայելի Սամարիա մարզի Արիել քաղաքում իրականացված ահաբեկչությունից տուժած իսրայելցիներին:
Հաղորդվում է, որ Էրդողանը դարձյալ շնորհավորել է Նեթանյահուին ընտրություններում հաղթանակի կապակցությամբ:
Նշենք, որ վերջերս Թուրքիան և Իսրայելը հայտարարեցին դիվանագիտական հարաբերությունների լիարժեք վերականգնման մասին: Սեպտեմբերին Իրիթ Լիլիանը, ով Անկարայում Իսրայելի ժամանակավոր հավատարմատարն էր, նշանակվել է դեսպանի պաշտոնում։ Իսկ Երուսաղեմում Թուրքիայի գլխավոր հյուպատոս Շաքիր Օզքան Թորունլարը նշանակվել է Իսրայելում Թուրքիայի դեսպան։
Հետևեք մեզ տելեգրամում
