Իրանի մայրաքաղաք Թեհրանում գտնվող «Մեհրսուն» պատկերասրահում «Իրանահայեր» խորագրով ցուցահանդես է բացվել, որտեղ ներկայացված են լուսանկարներ, քանդակներ և արվեստի այլ տեսակների գործեր։
Ցուցահանդեսում տեղ են գտել Իրանի հայկական համայնքի արվեստագետների աշխատանքները, ինչպես նաև հայ համայնքի ականավոր երաժիշտների և կատարողական արվեստի ներկայացուցիչների կյանքի, ստեղծագործությունների ու Իրանի արվեստի զարգացման գործում նրանց դերակատարման վերաբերյալ նյութեր:
Բացման արարողությանը ներկա են գտնվել Իրանում Հայաստանի արտակարգ և լիազոր դեսպան Արտաշես Թումանյանը, Թեհրանի Հայոց թեմի առաջնորդ` Գերաշնորհ Տ. Սեպուհ Արքեպիսկոպոս Սարգսյանը, Իրանի երաժշտական թանգարանի տնօրեն Ալի Մորադխանին և Իրանի նկարիչների միության նախագահ Մաջիդ Ռաջաբի-Մեմարը:
Արարողության ժամանակ Արտաշես Թումանյանը նշել է, որ ցուցահանդեսն արտացոլում է Հայաստանի և Իրանի երկու ժողովուրդների միջև հարաբերությունների խորությունը: Իր ելույթում Թեհրանի Հայոց թեմի առաջնորդ Գերաշնորհ Տ. Սեպուհ Արքեպիսկոպոս Սարգսյանը նշել է, որ ցուցահանդեսը ցույց է տալիս Իրանի և Հայաստանի ժողովուրդների դարավոր բարեկամությունը և հավելել, որ ցուցահանդեսը երկու ժողովուրդների երկխոսությունն է արվեստի միջոցով:
«Իրանահայեր» ցուցահանդեսը կազմակերպվել է Իրանում Հայաստանի դեսպանատան, Իրանի հայկական համայնքի, Թեհրանի հայոց թեմի առաջնորդարանի և «Մանուկյան» թանգարանի համագործակցության արդյունքում:
Հետևեք մեզ տելեգրամում
