Թուրքիան համալրում է իր սպառազինությունները

Թուրքիան 2020թ․ համար ծրագրում է իրականացնել սպառազինությունների գնման հավակնոտ նախագիծ, քանի որ երկիրը վերականգնվում է 2018թ․ տնտեսական ճգնաժամից հետո, իսկ կառավարությունը փողերը ծախսում է տարբեր ճակատներում, այդ թվում՝ Սիրիայում և Իրաքում պատերազմների վրա: Այս մասին հայտնում է «Defense News»-ը։

Աղբյուրի փոխանցմամբ`թուրքական ռազմական «Akıncı» անօդաչու թռչող սարքը զինվորականներին կհանձնվի 2020թ․ վերջին։ Թուրքիան նաև սպասում է Kamikaze Kargu-2 անօդաչուի մատակարարմանը։

Թուրքիայի կառավարությունը պաշտպանական սարքեր մատակարարող «STM» ընկերության հետ պայմանագրով ձեռք է բերում ընդհանուր առմամբ 356 միավոր «Kargu-2» անօդաչու թռչող սարք։ «STM»-ն նաև պատրաստվում է մատակարարել ինքնավար մարտավարական գրոհող ինքնաթիռներ։

Նշվում է, որ Թուրքիան այս տարի նույնպես բեռնատար անօդաչուների արտադրության պայմանագիր կկնքի։

Թուրքիան որոշակիացրել է իր պաշտպանական արդյունաբերության համար հավակնոտ նպատակներն ու ռազմավարությունները, ընդ որում՝ պաշտպանական ու աերոտիեզերական շրջանառության ծավալը 2023թ․ պետք է հասնի 26,9 մլրդ դոլարի՝ 2018 թ․ 6,7 մլրդ դոլարից։