Նախօրեին Թեհրանում ուշագրավ զուգադիպությամբ տեղի են ունեցել երկու աննախադեպ իրադարձություններ, որոնք, անկախ իրարից, բացահայտ հակաադրբեջանական ուղղվածություն ունեն։ Նախ, զինված հարձակում է տեղի ունեցել Թեհրանում Ադրբեջանի դեսպանատան դեմ։ Չնայած՝ ըստ նախաքաննության տրամադրած տեղեկատվության, այս գործողությունը մասնավոր բնույթի է, այնուամենայնիվ, պարզորոշ ցուցիչ է Բաքու-Թեհրան հարաբերություններում ամիսներ շարունակվող աննախադեպ լարվածության և, վստահաբար, ավելի է խորացնելու այն։
Մյուս իրադարձությունն Ադրբեջանի կողմից շաբաթներ շարունակվող Քաշաթաղի միջանցքի արգելափակման հետևանքով հումանիտար ճգնաժամ ապրող արցախահայ հայրենակիցներին Թեհրանի հայ համայնքի կողմից բարձր մակարդակի աջակցության ակցիայի կազմակերպումն ու անցկացումն է։ Այս միջոցառումը բացառիկ է նրանով, որ չէր կարող տեղի ունենալ առանց Իրանի իշխանությունների արտոնման, քանի որ Արցախի հետ կապված հարցերում պաշտոնական Թեհրանը բավականաչափ նուրբ է գործում։ Այս համատեքստում հատկանշական է ընդգծել մեկ այլ կարևոր նրբություն ևս։ Հայաստանում ոչ ֆորմալ դաշնակցային հարաբերությունների տեսլականով իր ազդեցությունը մեծացնել ձգտող Իրանում տեղի է ունենում նման գործողություն այն դեպքում, երբ Երևանի դե-յուրե Մոսկվայի կողմից ոչ միայն խստորեն արգելվում է նմանատիպ միջոցառումների անցկացումը, այլև դրանց փորձերը կանխվում են, իսկ կազմակերպիչները՝ պատասխանատվության ենթարկվում։
Դատելով թեհրանյան վերոնշյալ իրադարձությունների և դրանց ածանցյալ մի շարք այլ զարգացումների (որպես օրինակ՝ Թուրքիայի իշխանությունների՝ ամենաբարձր մակարդակով անհապաղ և համակողմանի խոսքային աջակցություն դրսևորումը Ադրբեջանին) բազմակողմանի արձագանքներից, թերևս բացահայտ են դառնում Ադրբեջան-Իրան խորը ճգնաժամի ընդլայնման անկանխելի վտանգավոր միտումները։
Արմեն Պետրոսյան
Հետևեք մեզ տելեգրամում
