Իրանի ԻՀՊԿ-ի հետ ասոցացվող ոչ պաշտոնական թելեգրամյան ալիքներից մեկը գրել է, որ Ադրբեջանի ԱԳ նախարար Ջեյհուն Բայրամովն Իրանի փոխարտգործնախարարի հետ հանդիպմանը ոչ կառուցողական հայտարարություններ է արել:
Թելեգրամյան ալիքի տեղեկություններով՝ Բայրամովն անգամ ուշադրություն չի դարձրել Թեհրանում Ադրբեջանի դեսպանատան վրա հարձակման վերաբերյալ իրանական կողմի բացատրություններին։
Ավելի վաղ ISNA-ն հաղորդել էր, որ Իրանի ԱԳ նախարարի՝ տնտեսական դիվանագիտության հարցերով տեղակալ Մեհդի Սաֆարին Չմիավորման շարժման նիստին մասնակցելու նպատակով մեկնել է Բաքու:
Բաքվում Սաֆարին առանձին հանդիպում է ունեցել Ադրբեջանի արտգործնախարար Ջեյհուն Բայրամովի և փոխարտգործնախարար Խալաֆ Խալաֆովի հետ։ Նշվել է, որ սա որևէ իրանցի պաշտոնյայի առաջին այցն է Բաքու Թեհրանում Ադրբեջանի դեսպանատան հարձակումից հետո։
Ցավակցություն հայտնելով Ադրբեջանի կառավարությանն ու ժողովրդին՝ Սաֆարին զեկույց է ներկայացրել Ադրբեջանի դեսպանատան վրա հարձակում իրականացնողի գործի վերջին զարգացումների վերաբերյալ և խնդրել է Ադրբեջանի իշխանություններին թիմեր ուղարկել Թեհրան՝ երկու երկրների համապատասխան փորձագետների միջոցով հետաքննությունն արագացնելու համար։
Հետևեք մեզ տելեգրամում
