Երեկ էմիրաթցի տիեզերագնաց Սուլթան Ալ-Նեյադին Dragon մոդելի տիեզերանավով բարեհաջող թռիչք է կատարել տիեզերք՝ իրականացնելով արաբական աշխարհի ամենաերկարատև տիեզերական առաքելությունը:
Ուղիղ հեռարձակմամբ NASA-ն հաղորդել էր, որ երեկ առավոտյան ժամը 9։40-ին տիեզերանավը օդ է բարձրացել NASA-ի «Kennedy Space Center» կայանից (Քենեդիի տիեզերական կենտրոնից):
Կարճ ժամանակ անց Ալ-Նեյադին ուղիղ հեռարձակմամբ հաղորդագրություն է ուղարկել տիեզերքից՝ ասելով.
«Շնորհակալ եմ իմ ծնողներին, իմ ընտանիքին, շնորհակալություն մեր ղեկավարությանը…բոլոր նրանց, ովքեր մեզ մարզել են և պատրաստել այս առաքելությանը»:
Նշենք, որ ԱՄԷ-ն արդեն ունի Մարսի շուրջ պտտվող տիեզերանավ, իսկ էմիրաթցի երկու տիեզերագնացներ Հյուսթոնում մարզվում են NASA-ի տիեզերագնացների հետ:
Ուշագրավ է, որ սաուդ արքայազն Սուլթան բն Սալմանն առաջին արաբն էր, որ տիեզերք էր ուղևորվել 1985 թվականին: Երկու տարի անց սիրիացի տիեզերագնաց Մուհամմեդ Ֆարիսը Ռուսաստանի կողմից իրականացված առաքելության հետ թռիչք էր կատարել տիեզերք: Երկուսն էլ մոտ մեկ շաբաթ տիեզերքում էին։
Al Arabiya-ն գրել է, որ այս գարնանը Ալ-Նեյադիին կմիանան երկու սաուդ տիեզերագնացներ իրենց կառավարության կողմից վճարվող SpaceX կարճ մասնավոր թռիչք կատարելու համար:
Հետևեք մեզ տելեգրամում
