Իրան-Սաուդյան Արաբիա, Սիրիա-արաբական երկրներ հարաբերությունների կարգավորման գործընթացներին զուգահեռ՝ 11 տարվա ընդմիջումից հետո տրվել է նաև Մերձավոր Արևելքի մյուս 2 կարևոր դերակատարների՝ Թուրքիայի և Եգիպտոսի միջև երկխոսության մեկնարկը։ Այս մասին Facebook-ի իր էջում գրել է արաբագետ Արմեն Պետրոսյանը:
Պետրոսյանը հիշեցրել է, որ օրեր առաջ Կահիրեում կայացել է Եգիպտոսի և Թուրքիայի արտգործնախարարներ՝ Սամեհ Շուքրիի և Մևլյութ Չավուշօղլուի հանդիպումը: Արտգործնախարարները քննարկել են ոչ միայն երկկողմ հարաբերությունների լիարժեք վերականգնման, այլև դրանց խորացմանը միտված հարցերի լայն շրջանակ:
«Այս հիմնախնդրի կարգավորումը բարելավելու է տարածաշրջանի անվտանգային միջավայրը հատկապես պաղեստինյան, լիբիական և Արևելյան Միջերկրածովյան հիմնախնդիրների առնչությամբ՝ այս կարևոր մրցակիցների փոխհարաբերությունները հակամարտայինից տեղափոխելով համագործակցային հարթություն»,- գրել է արաբագետը:
Պետրոսյանի խոսքով՝ Թուրքիա-Եգիպտոս հարաբերությունների կարգավորումն էական ազդեցություն է ունենալու նաև Մերձավոր Արևելքի և Աֆրիկայի առևտրատնտեսական միջավայրի վրա՝ հաշվի առնելով այս երկրների տնտեսական լայն ներուժը։
Հետևեք մեզ տելեգրամում
