Նոուռուզին Իրանի փոխարտգործնախարար Ալի Բաղերիի ՀՀ այցը մատնացույց է անում Հայաստանի ու Կովկասի կարևորությունն Իրանի համար: Նման տեսակետ է հայտնել միջազգային հարաբերությունների հարցերով իրանցի փորձագետ Էհսան Մովահեդիանը՝ IRIB-ի լրատվական ալիքին տված հարցազրույցում:
Նրա խոսքով՝ արաբական երկրների հետ հարաբերությունների կարգավորումից հետո Իրանի համար անկայուն են մնում միայն Կովկասի սահմանները:
Փորձագետի խոսքով՝ Ալիև-Էրդողան հանդիպումից, Իսրայելից զենքի նոր գնումներից հետո Բաքվի ռազմական տեղաշարժերը նոր թափ են ստացել:
«Իր երկրի շահերի մասին մտածելու փոխարեն՝ Ալիևը շտապում է Հայաստանի սահմաններին արկածախնդրության դիմել, քանի որ հաշվի առնելով Իսրայելում ու Թուրքիայում ներքին դրությունը, Ռուսաստանին կանգնեցնելու գործում Արևմուտքի ձախողումը՝ ժամանակն Ալիևի օգտին չէ»,-նշել է նա:
Փորձագետն ընդգծել է, որ Հայաստանի վրա Ալիևի նոր հարձակման նպատակը հայ-իրանական սահմանը վերացնելը, ՌԴ դեմ նոր ճակատ բացելը, 100 օրվա շրջափակումից հետո Արցախն օկուպացնելը, «Զանգեզուրի միջանցք» ստեղծելը, Իրանին էներգետիկ ու տրանսպորտային երթուղիներից դուրս թողնելը, Իրանի, ՌԴ, Չինաստանի սահմաններ ահաբեկիչներ ու անջատողականներ տեղափոխելն է:
Հետևեք մեզ տելեգրամում
