Ապրիլի սկզբին նախատեսվում է Սիրիայի, Ռուսաստանի, Իրանի և Թուրքիայի փոխարտգործնախարարների միջև քառակողմ հանդիպում անցկացնել:
«Ներկայումս նախապատրաստվում ենք, և ես ակնկալում եմ, որ այս խորհրդակցությունները տեղի կունենան Մոսկվայում ապրիլի սկզբին՝ արտգործնախարարների հանդիպումը նախապատրաստվելու համար», – ռուսական Sputnik լրատվական գործակալության փոխանցմամբ՝ ասել է ՌԴ փոխարտգործնախարար Միխայիլ Բոգդանովը։
Թուրքիայի նախագահի խոսնակ Իբրահիմ Քալընը հաստատել է, որ հանդիպումը տեղի կունենա, իսկ լրացուցիչ մանրամասների մասին ավելի ուշ կհայտարարեն:
«Այս հանդիպումների նպատակն է պաշտպանել Սիրիայի տարածքային ամբողջականությունը և ստեղծել մի համակարգ, որը հաշվի կառնի մեր անվտանգության մտահոգությունները»,- ընդգծել է Քալընը:
Նշենք, որ քառակողմ հանդիպումը նախատեսվում էր անցկացնել դեռևս մարտի 15-16-ը: Ինչպես գրում է Asharq Al- Awsat-ը, հանդիպումը հետաձգվել էր «տեխնիկական պատճառներով»՝ Ռուսաստանի խնդրանքով և հնարավոր է Սիրիայի հետ խորհրդակցություններ անցկացնելու նպատակով։
Հետաձգումը համընկավ Սիրիայի նախագահ Բաշար ալ-Ասադի՝ Մոսկվա կատարած այցի հետ: Բաշար ալ-Ասադը հայտարարել էր, որ Թուրքիայի նախագահ Ռեջեփ Թայիփ Էրդողանի հետ կհանդիպի միայն այն ժամանակ, երբ Անկարան պատրաստ կլինի ամբողջությամբ դուրս բերել իր զինված ուժերը Սիրիայի հյուսիսից: Միայն զինված ուժերի դուրսբերումը հիմք կհանդիսանա ապագա հանդիպումների կամ բանակցությունների համար:
Հետևեք մեզ տելեգրամում
