Իրանի ԱԳՆ խոսնակ Նասեր Քանանին դատապարտել է Իսրայելի արտգործնախարարի՝ Ադրբեջանի հետ Իրանի դեմ միասնական ճակատ ստեղծելու հայտարարությանը:
Քանանիի խոսքով՝ այս հայտարարությունը ոչ այլ ինչ է, քան հերթական ապացույց, որ «սիոնիստական ռեժիմը» մտադիր է Ադրբեջանի տարածքը վերածել սպառնալիքի Իրանի ազգային անվտանգության համար:
Իրանի ԱԳՆ խոսնակը բացատրություն է պահանջել Բաքվի իշխանություններից՝ շեշտելով, որ Իսրայելի ու Ադրբեջանի արտգործնախարարների հայտարարություններն անուղղակի կերպով հաստատում են այդ երկրների համագործակցության հակաիրանական կողմնորոշվածությունը:
«Իրանը միշտ փորձել է խափանել երկու հարևան երկրների միջև բաժանաում առաջացնելու չարակամների ջանքերը, և ակնկալվում է, որ Ադրբեջանի կառավարությունը նույնպես կխուսափի երկու երկրների թշնամիների լարած թակարդից»,- ընդգծել է Քանանին:
Խոսնակը հավելել է, որ պաշտոնական Թեհրանը «չի կարող անտարբեր մնալ իր դեմ Ադրբեջանի տարածքից սիոնիստական ռեժիմի դավադրության նկատմամբ»:
Հիշեցնենք, որ Իսրայելի արտգործնախարար Էլի Կոհենը ադրբեջանցի պաշտոնակցի հետ հանդիպման ժամանակ հայտարարել էր Իրանի դեմ միասնական ճակատ է ձևավորվելու:
Հետևեք մեզ տելեգրամում
