Վրաց ուղղափառ եկեղեցու քահանա Վիտալի Գվինիաշվիլին հայտարարել է, որ վրաց-ադրբեջանական սահմանին գտնվող վրացական Դավիթ Գարեջի վանական համալիրի տարածքում ադրբեջանական կողմը փոփոխություններ է իրականացնում։
«Ադրբեջանը սկսել է ջնջել վրացական հետքերը և այնտեղ ստեղծել ադրբեջանական ենթակառուցվածքներ», – ասաց քահանան `հրապարակելով վանքերի համալիրի տարածքում Ադրբեջանի կողմից կատարվող աշխատանքների որոշ լուսանկարներ:
Փետրվարի 20-ին վանականները նախատեսում էին այցելել համալիր: Հայր Վիտալին նաև հայտնեց, որ Գարեջին պատկանում է Վրաստանին, և մի քանի օրվա ընթացքում նրանք կկազմակերպեն համազգային երթ դեպի վանական համալիր:
Ըստ վրացի հոգևորականի՝ Ադրբեջանը փոխել է իր մարտավարությունը վրացական վանական համալիրը յուրացնելու հարցում և այժմ սեփական՝ կարճաժամկետ, ընդամենը հարյուրամյա պատմություն փորձում է վերաշարադրել:
Հետապնդվող նպատակը ակնհայտ է. Աշխարհին ապացուցել իբրև թե իր հին ծագումը՝ յուրացնելու համար հին աղվանական մշակութային ժառանգությունը:
Հիշեցնենք, որ Վրաստանի և Ադրբեջանի միջև վեճեր են ծագել Դավիթ Գարեջի վանական համալիրի շուրջ: Բացի այդ, Ադրբեջանի սահմանային զորքերը ապօրինաբար ներխուժել են Վրաստան և կառուցել սահմանային ծառայության մի քանի հենակետեր Բաբաքյար լեռան վրա։
Հետևեք մեզ տելեգրամում
