Իսրայելն ամեն կերպ ջանում է, որ Իրանի ու Ադրբեջանի միջև կամ ընդհարում լինի, կամ հարաբերությունների խզում: Նման տեսակետ է հայտնել միջազգային անվտանգության հարցերով փորձագետ Աբոլֆազլ Բազարգանը՝ IRNA լրատվական գործակալությանը տված հարցազրույցում:
«Եթե հարաբերությունները խզվեն, ապա Իսրայեը կարող է Ադրբեջանի տարածքից հարվածել Իրանին»,- շեշտել է փորձագետը։
Փորձագետի խոսքով՝ Իսրայելն ու Ադրբեջանն Իրանում են անջատողականություն հրահրում:
Զրույցում Բազարգանն անդրադարձել է նաև Թուրքիայի դերին՝ հավելելով, որ Անկարան եղել է և կմնա Իրանի մրցակիցը: Սակայն փորձագետը հավելել է, որ Թուրքիան Իրանի հարցում Ալիևի ոճով չի գործում, քանի որ Իրանին պարտվելու փորձ ունի Սիրիայում:
Նա շեշտել է, որ Իրանն իր հերթին գիտակցում է, որ եթե ցանկանում է օգտվել միջազգային հաղորդակցության ուղիներից, ապա պետք է հարևանների հետ ունենա լավ հարաբերություններ։
Ամփոփելով զրույցը՝ փորձագետը եզրակացրել է, որ Իրանը պետք է առանց հակամարտության մտնելու մեծացնի իր ռազմական ուժը երկրի հյուսիսարևմտյան սահմաններին՝ դրանով կանխելով պատերազմն ու դավադրությունները, ինչպես նաև վտանգը տանի իր սահմաններից դուրս։
Հետևեք մեզ տելեգրամում
