Սիրիան պետք է կարողանա շուտով վերադառնալ Արաբական պետությունների լիգա, սակայն շատ մարտահրավերներ են սպասվում ավելի քան տասնամյակ ձգվող հակամարտությունը լուծելու համար: Այս մասին հայտարարել է Հորդանանի արտգործնախարար Այման Սաֆադին:
Սաֆադիի խոսքով՝ Սիրիան բավականաչափ ձայներ ունի Արաբական պետությունների լիգայում իր տեղը վերականգնելու համար:
«Վերադարձը լիգա տեղի կունենա: Խորհրդանշականորեն դա կարևոր կլինի, բայց… դա միայն խոնարհ սկիզբը կլինի շատ երկար, բարդ և դժվարին գործընթացի՝ հաշվի առնելով 12 տարի ձգվող հակամարտությունից հետո ստեղծված ճգնաժամի բարդությունը»,- ասել է Հորդանանի արտգործնախարարը CNN-ի հետ զրույցում:
Նշենք, որ երկուշաբթի Հորդանանի մայրաքաղաք Ամմանում Սիրիայի արտգործնախարար Ֆեյսալ Միկդադն առաջին անգամ հանդիպել էր արաբական պետությունների արտգործնախարարների հետ՝ Հորդանանի նախաձեռնության շրջանակներում: Նախաձեռնությունը սիրիական հակամարտության դադարեցման ճանապարհային քարտեզն է սահմանում:
Հորդանանի արտգործնախարարը հավելել է, որ հակամարտության կարգավորման հարցում իրական առաջընթաց գրանցելու Սիրիայի պատրաստակամությունը կօգնի նրան ձեռք բերել արաբական պետությունների աջակցությունը՝ արևմտյան պատժամիջոցների դադարեցման ուղղությամբ լոբբինգ իրականացնելու համար:
Արաբական պետությունների լիգայի խոսնակն իր հերթին հայտարարել էր, որ արաբական պետությունների արտգործնախարարները կիրակի կհանդիպեն Կահիրեում՝ քննարկելու Սիրիայի հետ հարաբերությունները կարգավորելու ջանքերը:
Հետևեք մեզ տելեգրամում
