Տարածաշրջանային հարցերով փորձագետ Արմեն Պետրոսյանը կարծում է, որ Ադրբեջանն ու Թուրքիան փորձում են Հայաստանին դրդել միակողմանի զիջումների ադրբեջանահայկական օրակարգի գրեթե բոլոր խնդրահարույց խնդիրների մասով՝ Արցախ, Սյունիքով միջանցք, ՀՀ տարածքների:
Փորձագետի կարծիքով՝ այս ամենն արվում է սահմանային զորաշարժի, դիվանագիտական, քարոզչական, հոգեբանական նպատակային արշավի, նոր պատերազմի սպառնալիքի ներքո՝ ռազմական դիվանագիտության կիրառման միջոցով:
Պետրոսյանը հնարավոր է համարում այն, որ Ադրբեջանը ձգտելու է թույլ չտալ Արցախում պետական իշխանության լիարժեք գործարկումը։
«Պուտին-Էրդողան հանդիպման հրապարակային մասում հարավկովկասյան խնդիրներին լայն արձագանքի բացակայությունը չի նշանակում, որ այս ուղղությամբ ծավալուն քննարկումներ և ստվերային պայմանավորվածություններ չեն եղել։ Սովորաբար նման կարգի սակարկությունների մասին չի էլ բարձրաձայնվում»,- նշել է փորձագետը Facebook-ի իր էջում:
Ըստ նրա՝ Ռուսաստան-Հայաստան լարվածության աճը նպաստում է տարածաշրջանում նոր պատերազմի հնարավորությունը, ինչպես նաև Հայաստանի ներսում ներքաղաքական լարվածության հավանականությունը։ Իսկ կուլիսային մակարդակում ընթանում են ակտիվ բանակցություններ տարբեր դերակատարների միջնորդությամբ։ Դրանց տապալումը հենց կանաչ լույս կլինի նոր պատերազմի համար։
«Թուրքիայի առաջնորդությամբ Անկարան և Բաքուն մի կողմից, Մոսկվան մյուս կողմից փորձում են ազդել տարածաշրջանային խնդիրների հետ կապված Թեհրանի դիրքորոշման վրա՝ հնարավորինս ներդաշանակեցնելով առաջինների շահերին»,- շեշտել է Պետրոսյանը:
Հետևեք մեզ տելեգրամում
