Սեպտեմբերի 5-ին Թուրքիայի նախագահ Ռեջեփ Թայիփ Էրդողանը կառավարության նիստից հետո, որի ընթացքում նաև ամփոփվել է նրա կատարած այցը Սոչի և հանդիպումը Ռուսաստանի նախագահ Վլադիմիր Պուտինի հետ, հերթական ծավալուն ելույթն է ունեցել։ Նա, խոսելով Սիրիայի հյուսիսում տեղի ունեցող զարգացումներից, մեղադրել է Սիրիայի նախագահ Բաշար ալ-Ասադին տարածաշրջանի խնդիրներն էլ ավելի խորացնելու մեջ։
«․․․ [Սիրիայում] վերջին օրերին տեղի ունեցող զարգացումները բացահայտ ցույց են տալիս մեր մտահոգությունների ու զգուշացումների իրավացիությունը։ Ոչ թե լուծման, այլ խնդրի մասը լինելու ռեժիմի համառությունն էլ ավելի է խորացնում տարածաշրջանի խնդիրները։ Որպես Թուրքիա վճռական ենք շարունակել աշխատել մնայուն լուծման համար՝ Սիրիայի տարածքային ամբողջականության, դեմոգրաֆիական իրողությունների՝ ներառյալ էթնիկ և մազհաբային սկզբունքի հիման վրա։ Բոլոր կողմերին, որոնք ազդեցություն ունեն տարածաշրջանի խմբերի վրա՝ ներառյալ Ամերիկային, Ռուսաստանին, Իրանին, ռեժիմին հրավիրում ենք ջանք ցուցաբերել այդ ուղղությամբ»,-նշել է Էրդողանը։
Այնուհետև շեշտելով Թուրքիայի հարավային սահմանների անվտանգության կարևորության մասին՝ Էրդողանն անդրադարձել է նաև Կովկասում տիրող իրավիճակի զգայունությանը։ Այդ համատեքստում նա «սադրիչ» է որակել Հայաստանի գործելակերպը։
«Մեր հարավային շրջանի կայունությունն ու անվտանգությունը շարունակելու է տեղ գրավել մեր երկրի առաջնային օրակարգի ամենավերին շարքերում մի ժամանակաշրջանում, երբ շարունակվում է Ռուսաստան-Ուկրաինա պատերազմը, Կովկասում Հայաստանի սադրիչ գործելակերպի գլխավորությամբ՝ հավասարակշռությունը շարունակում է պահպանել զգայունությունը, Բալկանները ցանկանում է ներքաշվել նորից հակամարտության մեջ և այս ամենի կողքին աշխարհի չորս կողմում նոր ճգնաժամեր են հասունանում»,-հայտարարել է Թուրքիայի նախագահը։
Հետևեք մեզ տելեգրամում
