Դավոսի համաշխարհային տնտեսական համաժողովի շրջանակներում կայացել է Իրանի ԱԳ նախարար Հոսեյն Ամիր Աբդոլլահիանի և ՀՀ նախագահ Վահագն Խաչատուրյանի հանդիպումը: Տեղեկությունը փոխանցում է ISNA լրատվամիջոցը:
Ըստ աղբյուրի՝ Աբդոլլահիանը, մատնանշելով իր՝ Հայաստան կատարած այցն ու տեղում ունեցած հանդիպումները, ընդգծել է, որ Հայաստանը կարևոր տեղ ունի Իրանի հարևանության քաղաքականությունում:
«Մեր գնահատականն այն է, որ երկու երկրների հարաբերությունները զարգանում են, և այդ հարաբերությունների ամրապնդումն ապահովում է երկու երկրների շահերը»,- շարունակել է Իրանի արտգործնախարարը:
Կարևորելով Հարավային Կովկասում անվտանգության ու կայունության պահպանումը՝ Աբդոլլահիանը հավելել է, որ պաշտոնական Թեհրանը մշտապես աջակցել և աջակցում է Երևանի ու Բաքվի միջև խաղաղության բանակցություններին:
Իրանի արտգործնախարարը վերահաստատել է պատմական հաղորդակցական ուղիների պահպանման և աշխարհաքաղաքական փոփոխությունների բացառման կարևորությունը:
Աբդոլլահիանը, մեջբերելով հոգևոր առաջնորդի խոսքերն առ այն, որ Հայաստանն Իրանի լավ հարևանն է, ընդգծել է, որ Հայաստանի հետ հարաբերությունները զարգացնելու հարցում որևէ սահմանափակում չկա:
Իր հերթին Խաչատուրյանը, գոհունակություն հայտնելով երկու երկրների բարեկամական հարաբերությունների առնչությամբ, նշել է, որ այդ բարեկամությունը պետք է փոխանցել հեագա սերունդներին: Նա նաև կարևորել է տարանցման ոլորտում երկկողմ համագործակցության զարգացումը:
Խաչատուրյանը շնորհակալություն է հայտնել Հարավային Կովկասում կայունության ու խաղաղության գործընթացին Իրանի աջակցության համար:
Հետևեք մեզ տելեգրամում
