Թուրքիայի իշխանությունները նոր տվյալներ են հրապարակել վերջին 2 շաբաթվա ընթացքում Թուրքիա-Հունաստան սահմանը հատած փախստականների հոսքի վերաբերյալ։ Հունաստանին սահմանակից Էդիրնեի նահանգապետարանի ներկայացրած տվյալներով, փախստականների շարժը Էդիրնեով դեպի Հունաստան սկսվել է փետրվաի 27-ին։ Այդ օրվանից ցայսօր դեպի Հունաստան է անցել 147 հազար 132 փախստական։ Ըստ նահանգապետարանի՝ փախստականների անկանոն շարժը դեպի Հունաստանի սահման շարունակվում է։
Հայտարարության մեջ ներկայացվել են նաև փախստականների ապօրինի մուտքը Հունաստան կանխելու նպատակով հունական կողմի իրականացրած կոշտ միջոցառումները։ Նշվել է, որ հույն սահմանապահները փախստականների ուղղությամբ ձայնային ռումբեր են արձակել և արցունքաբեր գազ կիրառել։ Ըստ թուրքական իշխանությունների՝ այս կոշտ միջոցառումների հետևանքով մահացել է 3 փախստական, վիրավորվել է 214։
Հիշեցնենք, որ փետրվարի 28-ին, երբ Սիրիայի Իդլիբ նահանգում ռազմական լարվածության հասավ գագաթնակետին, Անկարան հայտարարեց, որ այլևս ի վիճակի չի պահել Թուրքիայից Եվրոպա շարժվող փախստականներին: Նշենք, որ փետրվարի 27-ին սիրիական բանակի ավիահարվածների հետևանքով 33 թուրք զինվորական էր զոհվել։
Հայտարարությունից հետո Թուրքիան բացել է ԵՄ-ի հետ (թուրք-հունական ու թուրք-բուլղարական) սահմանը՝ թույլ տալով, որ փախստականները անցնեն Եվրոպա: Թուրքիայի այս քայլը ԵՄ կողմից մեկնաբանվեց որպես անընդունելի շանտաժ, որին Եվրոպան չի տրվելու։
Հետևեք մեզ տելեգրամում
