Իրանի նախագահ Մասուդ Փեզեշքիանն ընդունել է ՌԴ Ազգային անվտանգության խորհրդի քարտուղար Սերգեյ Շոյգուին: Տեղեկությունը փոխանցում է իրանական tasnimnews լրատվամիջոցը:
Իրանի նորընտիր նախագահն ընդգծել է, որ ՌԴ-ն այն երկրներից է, որ ծանր օրերին Իրանի ժողովրդի կողքին է եղել, և այդ ռազմավարական գործընկերոջ հետ հարաբերությունների զարգացումն Իրանի առաջնահերթություններից է: Փեզեշքիանն ընդգծել է նաև Իրանի ու ՌԴ տարածաշրջանային և միջազգային համագործակցության անհրաժեշտությունը:
Իրանի նախագահը Գազայի պատերազմն ու ՀԱՄԱՍ-ի քաղբյուրոյի ղեկավարի սպանությունը միջազգային իրավունքների խախտում է անվանել և քննադատել Իսրայելին ԱՄՆ ու արևմտյան որոշ երկրների աջակցությունը:
«Իրանը որևէ կերպ տարածաշրջանում պատերազմի և ճգնաժամի ընդլայնման չի ձգտում, բայց այդ ռեժիմը վճռականորեն կստանա իր հանցագործության ու հանդգնության պատասխանը»,- հայտարարել է Փեզեշքիանը:
Իր հերթին Շոյգուն Իրանին անվանել է տարածաշրջանում ՌԴ առանցքային և ռազմավարական դաշնակիցներից մեկը և գոհունակություն հայտնել բազմաբևեռ աշխարհ ստեղծելու և տարածաշրջանի անվտանգությունը ապահովելու ուղղությամբ երկու երկրների համատեղ ջանքերի կապակցությամբ: Նա կարևորել է Իրանի հետ հարաբերությունների զարգացումը և հավելել, որ ՌԴ-ն շահգրգռված է արագացնել համատեղ նախագծերի, այդ թվում՝ Հյուսիս-Հարավի իրագործումը:
Հետևեք մեզ տելեգրամում
