Իրանի խորհրդարանի ենթակառուցվածքների հանձնաժողովի ղեկավար Մոհամմադռեզա Ռեզաեի Քոուչին հայտարարել է, որ Ռաշտ-Աստարա երկաթուղու կառուցման համար ռուսների հետ դեռ վերջնական պայմանագիրը չի կնքվել, իսկ ձգձգումն իրանական կողմով չէ պայմանավորված:
«Ռաշտ-Աստարա երկաթուղու կառուցումը կառավարության առաջնահերթություններից է, և նրանք փորձում են կնքել այդ պայմանագիրը, սակայն ռուսները, կարծես թե, տեխնիկական հարցերի մասով դեռևս չեն եկել վերջնական եզրահանգման, թե ինչպես մասնակցեն, ներդրումներ կատարեն այս նախագծում»,- ILNA-ին տված հարցազրույցում ասել է Քոուչին:
Պաշտոնյայի խոսքով՝ ռուսների հետ բանակցություններում հիմնական խնդիրը Ռաշտ-Աստարա երկաթուղու նախագծի վերջնական գինն է և այդ նախագծի իրականացման եղանակը:
«Կային քննարկումներ, որ ներդրումներն ու կառուցումը ռուսներն իրականացնեն, իսկ փոխահատուցումը ստանան այդ ճանապարհից ստացած եկամուտով կամ որ ռուսներն այս նախագծին մասնակցեն վարկի շրջանակներում, ասում են, այս հարցերի շուրջ ռուսները դեռ վերջնական եզրահանգման չեն եկել»,- հավելել է իրանցի պաշտոնյայն:
Ըստ պատգամավորի՝ պատերազմի պատճառով ներդրումների հարցում ռուսների ցանկությունը գուցե նվազել է:
«Ռաշտ-Աստարա երկաթուղու նախագիծը թանկ, կարևոր, ռազմավարական և ազդեցիկ նախագիծ է, սակայն, կարծես թե, ֆինանսավորման հարցում ռուսների կողմից խնդիր կա, և ռուսները չեն կարողացել այս նախագիծը ֆինանսավորել:
Իրանն էլ հայտարարել է, որ այս նախագծի իրագործման համար ռուսական վարկի կարիքը չունի, այլ ցանկանում է, որ ռուսները ներդրումներ իրականացնեն այս նախագծում»,- եզրափակել է պատգամավորը:
Հետևեք մեզ տելեգրամում
