Հինգ մարդ է զոհվել, 22-ը՝ վիրավորվել Անկարայի մերձակայքում գտնվող՝ Թուրքիայի օդատիեզերական ընկերության (TUSAŞ) կենտրոնակայանի վրա հարձակման հետևանքով՝ հայտնել է Թուրքիայի ներքին գործերի նախարար Ալի Երլիքայան։
Նրա խոսքով՝ հարձակման հետ, ամենայն հավանականությամբ, կապված է երկրում արգելված Քրդստանի աշխատավորական կուսակցությունը՝ գրում է BBC-ն: Երլիքայան ավելի վաղ հայտնել էր, որ հարձակվողներից երկուսը՝ տղամարդ և կին, սպանվել են:
Թուրքական լրատվամիջոցները հաղորդում են, որ հարձակվողները ձեռնարկություն են ժամանել անվտանգության աշխատակիցների հերթափոխի ժամանակ։ Նրանք գործի են դրել պայթուցիկ սարք, որից հետո փոխհրաձգություն է սկսվել։ TUSAŞ-ի շտաբի անձնակազմը շտապ տարհանվել է ապաստարաններ։
ՆԱՏՕ-ի գլխավոր քարտուղար Մարկ Ռյուտեն ասել է, որ զրուցել է Ռեջեփ Էրդողանի հետ և հայտարարել, որ դաշինքը սատարում է Անկարային։ Հարձակումը դատապարտել են ԱՄՆ-ը, Գերմանիան և մյուս երկրները։
Քրդամետ «Ժողովուրդների հավասարություն և ժողովրդավարություն» կուսակցության (DEM) ներկայացուցիչները նույնպես դատապարտել են այդ գործողությունը՝ ասելով, որ դա տեղի է ունեցել այն ժամանակ, երբ թուրք հասարակությունը քննարկում է քուրդ զինյալների հետ երկխոսության հնարավորությունը։
Անկարայում տեղի ունեցած ահաբեկչության պատճառով Ռեջեփ Էրդողանը ընդհատել է BRICS գագաթնաժողովում իր մասնակցությունը և վերադարձել Թուրքիա:
Հետևեք մեզ տելեգրամում
