«Սա իշխանության յուրացում է և սահմանադրական հեղաշրջում Վրաստանում»․ ընդդիմադիր կուսակցությունները հրաժարվել են ճանաչել «Վրացական երազանքի» հաղթանակը

Վրաստանի ընդդիմադիր կուսակցությունները հրաժարվել են ճանաչել «Վրացական երազանքի» հաղթանակը խորհրդարանական ընտրություններում։ «Սա գողացված ընտրություններ են, սա իշխանության յուրացում է և սահմանադրական հեղաշրջում Վրաստանում։ Սա տեղի չի ունենա: Սա Ռուսաստանը չէ, սա Վենեսուելան չէ, սա Վրաստանն է»,- ասել է «Հանուն փոփոխությունների» կոալիցիայի առաջնորդ Նիկա Գվարամիան։

Այս կոալիցիան երկրորդն է ընտրություններում։ «Բիձինա Իվանիշվիլին գողացավ վրաց ժողովրդի հաղթանակը և գողացավ եվրոպական ապագան… Մենք չենք ճանաչում և մտադիր չենք ճանաչել այս գողացված ընտրությունների արդյունքները», – ասել է «Ազգային շարժում» կուսակցության նախագահ Թինա Բոկուչավան:

Կուսակցությունը հավաքել է ձայների 9,8 տոկոսը։

Հոկտեմբերի 26-ին Վրաստանում տեղի ունեցան խորհրդարանական ընտրություններ։ Դրանց մասնակցել է 18 կուսակցություն։ Կենտրոնական ընտրական հանձնաժողովի նախնական տվյալներով՝ 12 տարի իշխանության ղեկին մնացած «Վրացական երազանք»-ը հավաքում է ձայների 52,9 տոկոսը։ 5 տոկոսի արգելքը հաղթահարել են նաև «Ուժեղ Վրաստանը» (9%) և «Գախարիան՝ Վրաստանի համար» (8.2%)։