Թուրքիան, Ադրբեջանը և Հյուսիսային Կիպրոսի ինքնահռչակ թուրքական հանրապետությունը պատրաստ են անցնել ընդհանուր թյուրքական այբուբենի։ Այս մասին Բիշքեքում ընթացող Թյուրքական պետությունների կազմակերպության 11-րդ գագաթնաժողովին հայտնել է Թուրքիայի նախագահ Ռեջեփ Թայիփ Էրդողանը:
Թուրքիայի նախագահը հիշեցրել է, որ այս տարվա սեպտեմբերին ընդունվել է 34 տառից բաղկացած ընդհանուր թյուրքական այբուբենը։ Նա բարձր է գնահատել ընդհանուր թյուրքական այբուբենի ընդունումը՝ որպես համատեղ քայլ դեպի թյուրքական պետությունների ապագա։
«Այսուհետ անդամ երկրները, հիմք ընդունելով այս այբուբենը, պետք է վերադառնան իրենց արմատներին։ «Հյուսիսային Կիպրոսի թուրքական հանրապետությունը», Թուրքիան և Ադրբեջանը պատրաստ են անցնել ընդհանուր թյուրքական այբուբենին։ Կարևոր է, որ Ղազախստանը, Ղրղզստանը, Ուզբեկստանը և Թուրքմենստանը հանդես գան նոր այբուբենի անցնելու նախաձեռնությամբ»,-ասել է Էրդողանը։
Հետևեք մեզ տելեգրամում
