Լիբանանում, որտեղ իսրայելական բանակը գործողություններ է իրականացնում «Հեզբոլլահ» խմբավորման դեմ, նոյեմբերի 27-ի գիշեր ուժի մեջ է մտել հրադադարը, որը նախօրեին հաստատել է Իսրայելի կառավարությունը։
Մարտերը շարունակվել են մինչև ուշ գիշեր։ «Հեզբոլլահ»-ի զինյալները հայտնել են, որ անօդաչու սարքեր են արձակել Թել Ավիվի ռազմական օբյեկտների ուղղությամբ, իսկ իսրայելական բանակը Բեյրութի որոշ հատվածների տարհանման հրաման է տվել: Դրանից հետո, զինադադարի մեկնարկից մեկ ժամ առաջ օդային հարվածներ են հասցվել Բեյրութի հարավային արվարձաններին։
Զինադադարի պայմանների համաձայն՝ 60 օրվա ընթացքում իսրայելական զորքերը դուրս կգան Լիբանանից, «Հեզբոլլահ»-ի զինյալները կլքեն սահմանային շրջանները, իսկ լիբանանյան բանակը կտեղակայվի այնտեղ։
Իսրայելի վարչապետ Բենիամին Նեթանյահուն նշել է, որ զինադադարի պայմանագրի ժամկետը կախված կլինի «Հեզբոլլահ»-ի գործողություններից, և եթե խմբավորումը նորից փորձի զինվել, դա կհամարվի պայմանագրի խախտում։
Նոր համաձայնագիրը հիմնականում նման է ՄԱԿ-ի Անվտանգության խորհրդի 1701 բանաձևին, որն ընդունվել է 2006 թվականին և որով վերջ դրվեց Իսրայելի և «Հեզբոլլահ»-ի միջև պատերազմին։
Համաձայնագիրը թույլ կտա Իրանի կողմից աջակցություն ստացող խմբավորմանը հետ մղել Իսրայելի հետ սահմանից և ուժեղացնել լիբանանյան բանակը։
Հետևեք մեզ տելեգրամում
