Ապրիլի 8-ի դրությամբ հաստատվել է կորոնոավիրուսային հիվանդության 28 նոր դեպք, սակայն դրանց գումարվել է նախկինում վիճակագրությունից դուրս մնացած ևս 12 դեպք, ինչի հետևանքով վիճակագրության թիվն ավելացել է 40-ով:
Այս մասին գրել է ՀՀ առողջապահության նախարարի մամուլի խոսնակ Ալինա Նիկողոսյանը:
«Հաստատված դեպքերի ընդհանուր թիվը այս պահին կազմում է` 921: Վիճակագրությունից դուրս էին մնացել հաստատված 12 դեպք, որոնք արձանագրվել են վերջին 40 օրվա ընթացքում, երբ վիճակագրությունը չէր վարվում էլեկտրոնային համակարգի միջոցով: Այս պահին համակարգը ավտոմատացված է և վիճակագրական տվյալները մարդկային գործոնով պայմանավորված չեն»,- գրել է Նիկողոսյանը:
Վերջինը տեղեկացրել է նաև, որ ապրիլի 9-ի դրությամբ գրանցվել է մահվան նոր դեպք: 80-ամյա պացիենտն ունեցել է կորոնավիրուսային հիվանդություն, ծանր աստիճանի թոքաբորբ՝ բարդացած թոքերի ռեսպիրատոր դիստրես համախտանիշով։ Տղամարդն ունեցել է ուղեկցող խրոնիկ հիվանդություններ, այդ թվում՝զարկերակային հիպերտենզիա, կախեքսիա, ծերունական սկլերոզ։
Այսպիսով Հայաստանում ապրիլի 9-ի ժամը 11:00-ի դրությամբ կորոնավիրուսից ապաքինված պացիենտների թիվն ավելացել է 24-ով և գումարային բուժվածների թիվը դարձել է 138: Հանրապետությունում կորոնավիրուսի պատճառով արձանագրվել է ընդհանուր առմամբ 10 մահ։
Հետևեք մեզ տելեգրամում
