Միջազգային լրատվամիջոցները կարծում են, որ Հորդանանի թագավոր Աբդուլլահ Երկրորդը լարված պահվածք է ցուցաբերել ԱՄՆ-ի նախագահ Դոնալդ Թրամփի հետ հանդիպման ժամանակ:
ԶԼՄ-ները գրել են, թե Աբդուլլահ Երկրորդը նյարդայնացած, անհանգստացած և շփոթված էր թվում, լարվածությանից արագորեն թարթում էր աչքերը, երբ Թրամփը ներկայացնում էր Գազայի վերակառուցման մասին իր ծրագրերը:
CNN-ը գրում է, որ թեև Թրամփի կողքին նստած Աբդուլլահն ուղղակիորեն չի մերժել նախագահի առաջարկը, նրա անհանգստությունն ակնհայտ էր։ Նա ակնարկել է, որ շուտով Գազայի համար այլընտրանքային առաջարկներ ևս կներկայացվեն։
Հանդիպման ժամանակ Թրամփը համոզմունք է հայտնել, թե երբ ԱՄՆ-ը վերահսկողություն սահմանի Գազայի նկատմամբ, Մերձավոր Արևելքում առաջին անգամ կայունություն կզգան:
Աբդուլլահն արձագանքել է ԱՄՆ նախագահին՝ ասելով. «Կարծում եմ՝ պետք է հիշել, որ կա Եգիպտոսի և արաբական պետությունների ծրագիրը»:
«Կարծում եմ՝ խնդիրն այն է, թե ինչպե՞ս կարող ենք այս աշխատանքը այնպես անել, որ բոլորի համար լավ լինի… Եկեք մենք ինքներս մեզանից առաջ չընկնենք»,- հավելել է Հորդանանի թագավորը:
Իր հերթին Aljazeera-ն գրել է, որ Աբդուլլահը նրբանկատորեն հիշեցրել է, որ ցանկացած որոշում պետք է կայացվի Եգիպտոսի այլընտրանքային առաջարկի հրապարակվելուց հետո:
«Ես պետք է հաշվի առնեմ իմ երկրի լավագույն շահերը»,- հայտարարել է Հորդանանի թագավորը:
Նշենք, որ Հորդանան ու Եգիպտոսը դեմ են արտահայտվել Գազայից պաղեստինցիներին տեղահանելու և այն վերակառուցելու ԱՄՆ-ի նախագահի ծրագրին:
Հետևեք մեզ տելեգրամում
