Վրաստանի պաշտպանության նախկին նախարար Իրակլի Ալասանիան հարցազրույց է տվել «Ազատություն» ռադիոկայանի վրացական ծառայությանը, որում «Վրացական երազանքին» և Բիձինա Իվանիշվիլիին մեղադրել է Ֆրանսիայի հետ ՀՕՊ համաձայնագրի տապալելու մեջ։
Ալասանիան, ով պաշտպանական գերատեսչությունը ղեկավարել է 2012-2014թ-ին, հայտնել է, որ Ֆրանսիայի շնորհիվ մինչև 2021թ․ Վրաստանը կարող էր ամբողջովին զարգացած ՀՕՊ համակարգ ունենալ։ Ըստ պաշտպանության նախկին նախարարի՝ 2013-ին ինքը հանդիպել է այդ ժամանակ Ֆրանսիայի ՊՆ Ժան-Իվ Լը Դրիանին, ով առաջարկել է Վրաստանին զորախումբ ուղարկել Կենտրոնաաֆրիկյան Հանրապետություն։ Փոխարենը, Ալասանիայի հավաստմամբ, Ֆրանսիան համաձայնել է Վրաստանին վարկային համաձայնագրի շրջանակներում ՀՕՊ համակարգ տրամադրել։
Համաձայնագիրը պետք է ստորագրվեր 2014-ի հոկտեմբերին, սակայն, ըստ Ալասանիայի, իրեն զանգել է բարձրաստիճան քաղաքական գործիչ և ասել չստորագրել այն։ Ալասանիան մեղադրում է, որ այդ ժամանակ ճնշումներ էր գործադրում Բիձինա Իվանիշվիլին, ով արդեն չէր զբաղեցնում վարչապետի պաշտոնը։
Իրակլի Ալասանիան հարցազրույցում շեշտել է, որ իր և իր թիմակիցների վրա ճնշումներ գործադրելու համար օպտիկամանրաթելային մալուխներ գնելու վերաբերյալ գործ հարուցվեց, որի շրջանակներում ձերբակալվեց ՊՆ 5 աշխատակից։ Նրանք դատապարտվեցին 7 տարվա ազատազրկման, 2017-ին ազատ արձակվեցին նախագահի համաներմամբ։ Իսկ 2025թ․ փետրվարին ՄԻԵԴ-ը որոշում է կայացրել այդ գործի վերաբերյալ և հայտնաբերել արդար դատաքննության իրավունքի խախտումներ։
Դատական գործընթացների ֆոնին Իրակլի Ալասանիան Ֆրանսիայի հետ համաձայնագրի փոխարեն կնքել է հուշագիր, որն այսօր էլ ուժի մեջ է։ Ալասանիան «աններելի սխալ» է համարել «Վրացական երազանքի»՝ համաձայնագիրը արգելափակելու որոշումը։Նշենք, որ հուշագրի ստորագրումից 1 ամիս անց Ալասանիան հրաժարական տվեց, որն էլ «մալուխների գործի» հետ միասին հանգեցրեց «Վրացական երազանքի» պառակտման։
Հետևեք մեզ տելեգրամում
