Անկարայում Իրանի դեսպանատան գործերով ժամանակավոր հավատարմատարին հրավիրել են ԱԳՆ մտքերի փոխանակության համար։ Այս մասին հայտնել է Թուրքիայի ԱԳՆ խոսնակ Օնջու Քեչելին:
Քեչելին նշել է, որ հանդիպմանը քննարկվել են երկկողմ հարցերը, օրակարգ են բերվել նաև «որոշ իրանցի պաշտոնյաների՝ Թուրքիային ուղղված պնդումները»։
Խոսնակը նշել է, որ վերջին շրջանում նկատվել է, որ իրանցի պաշտոնյաները Թուրքիային ուղղված իրենց քննադատություններն ավելի շատ հանրության առջև են սկսել արտահայտել, ինչի վերաբերյալ նախարարության կողմից պատրաստված թղթապանակն ավելի վաղ փոխանցվել է իրանական կողմին։
«Մենք ամեն դեպքում մտածում ենք, որ արտաքին քաղաքականության հետ կապված հարցերը չպետք է ներքին քաղաքականության համար որպես նյութ օգտագործվեն։ Այդ շրջանակում այն կրիտիկական ուղերձները, որոնք պետք է տալ մեկ այլ երկրի, նախընտրում ենք, որ տրվեն ուղղիղ հասցեատերերին։ Այսօր ևս այդ ճանապարհին ենք հետևել։ Իրանի հետ մեր հարաբերություններին մեծ արժեք ենք տալիս։ Թուրքիայի և Իրանի միջև հարաբերությունների ամրապնդումը մեզ համար կարևորություն ունի», -ասել է նա։
Հիշեցնենք, որ Թեհրանում Թուրքիայի դեսպանին հրավիրել են Իրանի ԱԳՆ: Պատճառը Թուրքիայի ԱԳ նախարար Հաքան Ֆիդանի՝ «Al Jazeera» հեռուստաընկերությանը տված հարցազրույն էր: Թուրք արտգործնախարարը խոսել էր Իրանի տարածաշրջանային քաղաքականության մասին՝ հայտարարելով, որ Իրանը օգնում է իրենց կողմից ահաբեկչական ճանաչված «Քուրդիստանի բանվորական կուսակցությանը» (ՔԲԿ-PKK), «Սիրիայի դեմոկրատական ուժերին» (SDG) և «Սիրիայի քրդական ինքնապաշտպանական ուժերին»:
Հետևեք մեզ տելեգրամում
