Մոսկվան կոչ է արել սիրիացիներին, ովքեր ապաստանել էին Սիրիայի ափամերձ շրջանում գտնվող ռուսական Հմեյմիմ ավիաբազայում, հնարավորինս շուտ լքել տարածքը՝ պատճառաբանելով, որ նրանց պաշտպանությունն ապահովելու համար բավարար ռեսուրսներ չունեն։
Հմեյմիմի հրամանատարությունն ընդգծել է, որ ռուսական ուժերը զգալի ջանքեր են գործադրել խաղաղ բնակիչներին փրկելու համար, սակայն ընդունել են, որ բազան սահմանափակ ռեսուրսներ ունի և չի կարող երկար ժամանակ ապահովել համապատասխան կենսապայմաններ:
«Սիրիայի միջազգայնորեն ճանաչված կառավարությունը վերջին 10 օրվա ընթացքում զգալի ջանքեր է գործադրում Լաթակիայի նահանգում իրավիճակը կարգավորելու համար՝ համագործակցելով միջազգային մարդասիրական կազմակերպությունների հետ՝ նպատակ ունենալով վերականգնել կայունությունը և ապահովել քաղաքացիական անվտանգությունը»,-ասվում է ռուս անձնակազմի տարածած փաստաթղթում։
Նշենք, որ ՌԴ ԱԳՆ պաշտոնական ներկայացուցիչ Մարիա Զախարովան ավելի վաղ հայտնել է, որ Հմեյմիմ ավիաբազան ընդունել է մոտ 9000 տեղահանված սիրիացիների՝ մեծ մասը կանայք և երեխաներ, ովքեր ձգտում են պաշտպանվել բռնություններից։
Հիշեցնենք, որ մարտի 6-ից 10-ն ընկած ժամանակահատվածում Սիրիայի ափամերձ շրջաններում ինտենսիվ բռնությունների զոհ գնացին մոտ 1064 ալավի խաղաղ բնակիչ և յոթ քրիստոնյա։
Հետևեք մեզ տելեգրամում
