Ավելի քան 2000 իսրայելցի ապրիլի 19-ին դուրս է եկել Թել Ավիվի փողոցներ՝ բողոքի ցույցեր անցկացնելով վարչապետ Բենյամին Նեթանյահուի՝ իր գլխավոր հակառակորդի հետ «արտակարգ իրավիճակի» կառավարություն ձևավորելու փորձերի դեմ և մեղադրելով նրան, որ կորոնավիրուսային ճգնաժամը օգտագործում է կոռուպցիայի մեղադրանքով հետապնդումից խուսափելու համար:
Ցուցարարները կորոնավիրուսային սահմանափակումների կանոններին համապատասխան դիմակներ են կրել և սոցիալական հեռավորություն են պահել միմյանցից։ Ցուցարարները քննադատել են Նեթանյահուի հնարավոր գործընկերությունը մրցակից Բենի Գանցի հետ:
Անցած տարվա երեք ընտրությունների քարոզարշավի ժամանակ Գանցը խոստացել էր, որ երբեք չի նստի բանակցությունների Նեթանյահուի հետ կառավարություն կազմելու համար՝ վերջինիս իրավական խնդիրների պատճառով, անցյալ ամիս հայտարարեց, որ ընդունել է վարչապետի առաջարկությունը՝ ստեղծել «արտակարգ» կառավարություն՝ կորոնավիրուսով զբաղվելու համար: Այս հայտարարությունը զայրացրեց Գանցի կողմնակիցներից շատերին։
Նշվում է, որ Նեթանյահուին մեղադրանք է առաջադրվել խարդախության, արդարադատության խախտման և կաշառքի ընդունման համար: Նա հերքում է մեղադրանքները և համոզմունք հայտնում, որ ինքը թշնամական լրատվամիջոցների և ագրեսիվ ոստիկանության և դատախազների զոհն է:
Ցուցարարները Նեթանյահուին մեղադրում են ճգնաժամը շահագործելու մեջ` դատական քննությունից խուսափելու և իր երկարատև կառավարումն ամրապնդելու համար:
Ցուցարարները վանկարկել են «ժողովրդավարություն» և վարչապետին մեղադրել են երկրի ժողովրդավարական ինստիտուտները վտանգելու մեջ:
Հետևեք մեզ տելեգրամում
