ԱՄՆ նախագահ Դոնալդ Թրամփը հայտարարել է, որ Իրանի ղեկավարությունն այժմ ցանկանում է Վաշինգտոնի հետ երկխոսություն վարել ոչ թե միջնորդների, այլ ուղիղ:
«Կարծում եմ, որ ավելի լավ է, եթե մենք ուղիղ բանակցություններ ունենանք: Կարծում եմ՝ դա ավելի արագ կլինի, և դուք շատ ավելի լավ կհասկանաք մյուս կողմին, քան միջնորդների միջոցով գործելու դեպքում: Նրանք (իրանցիները) ցանկանում էին միջնորդներ օգտագործել: Չեմ կարծում, որ դա պարտադիր է հիմա: Կարծում եմ, որ նրանք անհանգստացած են: Կարծում եմ, որ նրանք իրենց խոցելի են զգում, և ես չեմ ուզում, որ նրանք այդպես զգան: Կարծում եմ, որ նրանք ցանկանում են հանդիպել»,-Վաշինգտոնից Մայամի թռիչքի ժամանակ լրագրողներին ասել է ԱՄՆ նախագահը:
Հարցրին՝ արդյոք նոր հաղորդագրություն ստացել է Իրանի իշխանություններից, Սպիտակ տան ղեկավարը ուղիղ պատասխան չի տվել։ «Կարծում եմ՝ նրանք կցանկանային ուղիղ բանակցություններ վարել, մոռացեք նամակների մասին, կարծում եմ՝ նրանք ցանկանում են ուղիղ խոսել»,-եզրափակել է ամերիկացի առաջնորդը:
Մարտի 7-ին Թրամփը հայտարարեց, որ ուղերձ է հղել Իրանի գերագույն առաջնորդ այաթոլլա Ալի Խամենեիին՝ միջուկային ծրագրի շուրջ բանակցություններ վարելու առաջարկով։ Թեհրանը հրաժարվեց ԱՄՆ-ի հետ ուղիղ երկխոսությունից, սակայն հավանական համարեց բանակցությունները շարունակել միջնորդների միջոցով։
Հետևեք մեզ տելեգրամում
