Թուրքիան և Վրաստանն ակնկալում են, որ ընթացիկ տարում երկկողմ ապրանքաշրջանառությունը կավելանա ավելի քան 55%-ով։ Այս մասին ասվել է Վրաստանի վարչապետ Իրակլի Կոբախիձեի և Թուրքիայի նախագահ Ռեջեփ Թայիփ Էրդողանի հանդիպմանը, որը տեղի է ունեցել ապրիլի 12-ին Անթալիայում դիվանագիտական ֆորումի շրջանակներում։
«Նշվել է, որ Թուրքիան Վրաստանի խոշորագույն առևտրային գործընկերն է: Կողմերը հույս են հայտնել, որ 2025 թվականին երկկողմ ապրանքաշրջանառությունը կկազմի 5 միլիարդ դոլար», – ասվում է Վրաստանի կառավարության տարածած հայտարարության մեջ։
Հանդիպման արդյունքներով կողմերը պայմանավորվել են վերսկսել տնտեսական համագործակցության միջկառավարական հանձնաժողովի աշխատանքը։ Այն վերջին անգամ անցկացվել է 2019 թվականին՝ 14 տարվա ընդմիջումից հետո, սակայն համավարակի պատճառով կրկին դադարեցվել է։
Վրաստանի և Թուրքիայի միջև առևտուրն իրականացվում է ներմուծման նվազագույն մաքսատուրքերով և պարզեցված մաքսային ընթացակարգերով։ 2008 թվականին ազատ առևտրի համաձայնագրի կնքումից հետո երկրները հետևողականորեն քայլեր են ձեռնարկում երկկողմ արտահանման և ներմուծման խթանման ուղղությամբ։
2024 թվականին Վրաստանի և Թուրքիայի միջև ապրանքաշրջանառության ծավալը կազմել է մոտ 3.1 միլիարդ դոլար։ Միևնույն ժամանակ, Թուրքիան Վրաստանին մատակարարում է գրեթե հինգ անգամ ավելի շատ ապրանք:
Սակայն 2025 թվականի սկիզբը նշանավորվել է անկմամբ. հունվար-փետրվարին ապրանքաշրջանառությունը կրճատվել է մինչև 384 միլիոն դոլար՝ 2024 թվականի նույն ժամանակահատվածի 472.8 միլիոն դոլարի դիմաց։
Հետևեք մեզ տելեգրամում
