Իրանի ԱԳՆ խոսնակ Էսմայիլ Բաղաեին մամուլի ասուլիսի ժամանակ, անդրադառնալով Իրան-ԱՄՆ բանակցություններին, նշել է, որ բանակցությունների գլխավոր թեման միջուկային հարցի քննարկումն ու պատժամիջոցների վերացումն է։ Նա շեշտել է, որ պետք է լինի նաև երաշխիք, որ կողմերը կկատարեն ստանձնած պարտավորությունները։
Բաղաեին հերքել է բանակցությունների մանրամասների վերաբերյալ մամուլում շրջանառվող լուրերը՝ ընդգծելով, որ նման բանակցությունների մանրամասները լրատվամիջոցներում քննարկման ենթակա չեն։
Խոսնակը հայտնել է, որ բանակցությունների հաջորդ փուլը, ինչպես նաև տեխնիկական քննարկումները անցկացվելու են Մասկատում։ Բաղաեին նաև հայտնել է,որ Իրանի արտգործնախարարը վաղը մեկնելու է Չինաստան։
Հիշեցնենք, որ ապրիլի 19-ին Հռոմում Օմանի դեսպանատանը մեկնարկել է Իրան-ԱՄՆ ոչ ուղիղ բանակցությունների երկրորդ փուլը։ Դրանք անցկացվել են նույն եղանակով, ինչ առաջին փուլում. ամերիկյան ու իրանական պատվիրակությունները գտնվում են առանձին սրահներում և միմյանց ուղերձներ են փոխանցում Օմանի արտգործնախարարի միջոցով։ Բանակցությունների առաջին փուլը կայացել էր Օմանի մայրաքաղաք Մասկատում ապրիլի 12-ին:
Հետևեք մեզ տելեգրամում
