Ուկրաինայի նախագահ Վլադիմիր Զելենսկին հաստատել է, որ ապրիլի 23-ին Լոնդոնում բանակցություններ կանցկացվեն Ուկրաինայի, ԱՄՆ-ի և եվրոպական երկրների պատվիրակությունների միջև՝ նվիրված Ուկրաինայի զինված հակամարտության կարգավորմանը։
«Արդեն չորեքշաբթի մեր ներկայացուցիչները կաշխատեն Լոնդոնում: Ուկրաինան, Մեծ Բրիտանիան, Ֆրանսիան, Միացյալ Նահանգները. մենք պատրաստ ենք շարունակել շարժվել հնարավորինս կառուցողական՝ հասնելու անվերապահ զինադադարի, որին կհաջորդի իրական և տեւական խաղաղություն։ Շնորհակալ եմ բոլոր գործընկերներին, ովքեր օգնում են: Անվերապահ զինադադարը պետք է լինի առաջին քայլը դեպի խաղաղություն, և հենց այս Զատկի շրջանը ցույց տվեց, որ Ռուսաստանի գործողություններն են պատերազմի երկարացման պատճառ»,-Մեծ Բրիտանիայի վարչապետ Քիր Սթարմերի հետ զրույցից անմիջապես հետո սոցցանցերում գրել է Զելենսկին:
Բանակցությունների մասին ավելի վաղ հայտնել էր The Wall Street Journal-ը: Թերթի ունեցած տվյալներով, Վաշինգտոնը Կիևին ներկայացրել է պատերազմը դադարեցնելու առաջարկներ, որոնք ներառում են ԱՄՆ-ի կողմից Ղրիմի բռնակցման ճանաչումը և Ուկրաինայի՝ ՆԱՏՕ-ին միանալու մերժումը: Միևնույն ժամանակ, Ուկրաինայում կարգավորման ամերիկյան ծրագրի որոշ գաղափարներ չեն համապատասխանում Ռուսաստանի կողմից առաջադրված պահանջներին։ Օրինակ՝ Միացյալ Նահանգները չի պատրաստվում ճանաչել, որ Ռուսաստանը օրինական իրավունք ունի վերահսկելու Ուկրաինայի արևելյան չորս շրջանները:
Հետևեք մեզ տելեգրամում
