Թուրքիայում արգելված և ահաբեկչական ճանաչված Քրդստանի աշխատավորական կուսակցությունը (PKK) մինչև ապրիլի վերջ ինքնալուծարման որոշում կկայացնի։ Այս մասին հայտնում է թուրքական մերձիշխանական Hürriyet թերթը։
Թուրքիայի իշխող «Արդարություն և զարգացում» կուսակցության (AKP) պաշտոնական ներկայացուցիչ Օմեր Չելիքն ապրիլի 21-ին լրագրողներին ասել է, որ քրդական երկարամյա խնդրի լուծման հարցում ընթացիկ ամսվա ընթացքում կարող է զգալի առաջընթաց լինել։ Նման մտքեր են հայտնել նաև Թուրքիայի քրդամետ DEM (Ժողովուրդների հավասարության ու ժողովրդավարության) կուսակցության ներկայացուցիչները, որոնք ապրիլի 22-ին հանդիպել են ահաբեկչական գործունեության համար ցմահ ազատազրկման դատապարտված PKK-ի առաջնորդ Աբդուլլահ Օջալանի հետ։
Հիշեցնենք, որ Օջալանը փետրվարի 27-ին PKK-ի հետ կապված բոլոր խմբավորումներին կոչ արեց վայր դնել զենքը, դադարեցնել հակամարտությունը Թուրքիայի հետ և լուծարել կազմակերպությունը։ Ի պատասխան այս կոչի՝ մարտի 1-ին PKK-ն հայտարարեց հրադադարի մասին և պատրաստակամություն հայտնեց համագումար հրավիրել՝ քննարկելու ինքնալուծարման հարցը։
Հետևեք մեզ տելեգրամում
