Ուկրաինան, հնարավոր է, տարածքային զիջումների գնա․ Կլիչկո

Ուկրաինան, հնարավոր է, ստիպված լինի մասնակի տարածքային զիջումներ կատարել Ռուսաստանի հետ խաղաղության համաձայնագրի շրջանակում՝ ԱՄՆ նախագահ Դոնալդ Թրամփի կողմից աճող ճնշման ֆոնին։ Այս մասին BBC-ի կազմի մեջ մտնող Radio 4-ին ասել է Կիևի քաղաքապետ Վիտալի Կլիչկոն։

«Սցենարներից մեկը տարածքից հրաժարվելն է։ Սա արդար չէ։ Բայց խաղաղության, ժամանակավոր խաղաղության համար սա կարող է ժամանակավոր լուծում լինել»,-ասել է նա՝ շեշտելով, որ եթե նույնիսկ Ուկրաինայի նախագահ Վլադիմիր Զելենսկին ստիպված լինի «ցավոտ որոշում» կայացնել, երկրի քաղաքացիները չեն ճանաչի Ռուսաստանի վերահսկողությունը կորցրած տարածքների նկատմամբ։

Նշենք, որ Ուկրաինայի նախագահը հրաժարվել է Ղրիմը պաշտոնապես ճանաչել որպես Ռուսաստանի մաս։ Ըստ The Wall Street Journal-ի, The Washington Post-ի, Bloomberg-ի և այլ լրատվամիջոցների աղբյուրների՝ այս կետն ընդգրկված էր ԱՄՆ-ի կողմից ներկայացված կարգավորման առաջարկներում, որոնք պետք է քննարկվեին ապրիլի 23-ին Լոնդոնում Ուկրաինայի, ԱՄՆ-ի և եվրոպական երկրների արտաքին գործերի նախարարների մակարդակով կայանալիք բանակցություններում։ ԱՄՆ պետքարտուղար Մարկո Ռուբիոն հրաժարվեց մասնակցել հանդիպմանը Զելենսկու դիրքորոշման պատճառով։ Արդյունքում բանակցությունները տեղի ունեցան այլ ձևաչափով՝ ավելի ցածր մակարդակով։