Նեթանյահուն դժգոհ է Թրամփի մերձավորարևելյան քաղաքականությունից

Իսրայելի վարչապետ Բենյամին Նեթանյահուն նեղ շրջապատում հայտարարել է, որ հիասթափված է ԱՄՆ նախագահ Դոնալդ Թրամփի Մերձավոր Արևելքի քաղաքականությունից։

Israel Hayom թերթի փոխանցմամբ, Նեթանյահուն իր օգնականներին ասել է, որ Թրամփը երկկողմ հանդիպումների ժամանակ ճիշտ բաներ է ասում, մասնավորապես՝ Սիրիայի և Իրանի վերաբերյալ, բայց նրա գործողությունները բոլորովին այլ բանի մասին են։

Նեթանյահուին, մասնավորապես, մտահոգում է այն, որ Թրամփն աջակցում է Թուրքիայի նախագահ Ռեջեփ Թայիփ Էրդողանի՝ Սիրիայում իր ազդեցությունը խորացնելու ջանքերը, թեև դրան զուգահեռ Իսրայելին թույլատրել է գործել այն երկրի տարածքում, որտեղ ինքը կցանկանա։

Նեթանյահուն նաև անհանգստացած է Թրամփի՝ Իրանի հետ միջուկային բանակցություններ սկսելու որոշմամբ, և այն զիջումներով, որոնք ենթադրաբար արվել են Թրամփի վարչակազմի կողմից՝ փոխարենը քիչ բանով։

Թերթի փոխանցմամբ՝ Նեթանյահուն նաև մտահոգված է ԱՄՆ ազգային անվտանգության նախկին խորհրդական Մայք Վոլցի պաշտոնից հեռացմամբ։

Իսրայելի վարչապետի գրասենյակը չի հերքել թերթի այս զեկույցը՝ նշելով, որ «օրեր առաջ տեղի ունեցած զրույցի ժամանակ վարչապետ Նեթանյահուն և նախագահ Թրամփը համաձայնել են, որ գերագույն նպատակը Իրանի միջուկային զենք ստանալու կարողության վերացումն է»։