Իրանի ճանապարհների և քաղաքաշինության նախարարության միջազգային հարցերով կենտրոնի ղեկավար, նախարարի խորհրդական Ամին Թարաֆոն նախարարության լրատվական կայքին տված հարցազրույցում նշել է, որ վերջին շրջանում լուրջ քայլեր են իրականացվել Իրանի և հարևան երկրների միջև միջազգային տրանսպորտային կապերի վերականգնման և ամրապնդման ուղղությամբ։
Նա, որպես օրինակ, նշել է Իրանի և Թուրքիայի միջև տրանսպորտային հարաբերությունները, որոնք նախկինում լարված են եղել՝ հավելելով, որ մի քանի փուլով նախարարական մակարդակով հանդիպումների և բանակցությունների արդյունքում հաջողվել է վերագործարկել Թեհրան-Վան ուղևորատար գնացքը, կարգավորել ճանապարհային փոխադրումների ոլորտի խնդիրները և նախաձեռնել երկաթուղային կապի ստեղծման գործընթաց Մարանդ-Չեշմե Սորայա-Դիլեջո-Կարս ուղղությամբ։
Թարաֆոն ընդգծել է, որ երեք տարվա լճացումից հետո Ադրբեջանի հետ տնտեսական կապերը վերագործարկվել են՝ շնորհիվ նաև Իրանի ճանապարհների և քաղաքաշինության նախարարի նախաձեռնությունների։
Նախարարի խորհրդականը նաև հայտնել է, որ Իրանի ճանապարհների և քաղաքաշինության նախարար Ֆարզանե Սադեղը Բաքվում հանդես է եկել նախաձեռնությամբ՝ ստեղծելու Իրան–Ադրբեջան–Վրաստան տարանցիկ միջանցք, որը ողջունվել է ադրբեջանական պաշտոնյաների կողմից։ Թարաֆոն նշել է, որ այս նախաձեռնությունն առանձնահատուկ կարևորություն ունի, քանի որ Սադեղը 2025 թվականին կգլխավորի ՏՐԱՍԵԿԱ-ի (Տրանսպորտային միջանցք Եվրոպա–Կովկաս–Ասիա) միջկառավարական հանձնաժողովը, որի անդամներ են նաև նշված երեք պետությունները։
Հետևեք մեզ տելեգրամում
