Թուրքիայի վերաբերյալ Եվրախորհրդարանի (ԵԽ) վերջին զեկույցը խիստ քննադատում է երկրի արտաքին քաղաքականությունը նախագահ Էրդողանի օրոք՝ այն որակելով որպես բախումնային, ԵՄ արժեքներին անհամատեղելի և վնասակար ԵՄ անդամակցության գործընթացի համար։ Այս մասին հայտնում է Nordic Monitor-ը:
Եվրախորհրդարանի զեկուցող Նաչո Սանչես Ամորի կողմից պատրաստված զեկույցը ընդգծում է Թուրքիայի աճող ռազմավարական ինքնավարությունը: Զեկույցում մտահոգություն են հայտնում Սիրիայում և Իրաքում Թուրքիայի շարունակական ռազմական ներկայության, քրդական խմբավորումների հետ շարունակական բախման և Լիբիայի ու Լեռնային Ղարաբաղի նման հակամարտություններում Անկարայի վճռական դերակատարման վերաբերյալ: Եվրախորհրդարանի անդամները եզրակացրել են, որ այս գործողությունները խաթարում են տարածաշրջանային կայունությունը և հակասում ԵՄ դիվանագիտական ջանքերին:
Փաստաթղթում նաև նշվում են Թուրքիայի լարված հարաբերությունները ՆԱՏՕ-ի և ԵՄ անդամ Հունաստանի ու ԵՄ անդամ Կիպրոսի հետ։
Զեկույցում ընդգծվում է Թուրքիայի եզակի աշխարհաքաղաքական դիրքը՝ Արևելքն ու Արևմուտքը խաչմերուկում, մասնավորապես՝ Ուկրաինայի պատերազմի վերաբերյալ: Գովաբանելով Անկարայի դերը Սև ծովի հացահատիկի գործարքի միջնորդության գործում՝ Եվրախորհրդարանի պատգամավորները խորապես քննադատում են Թուրքիայի շարունակական տնտեսական համագործակցությունը Մոսկվայի հետ:
Չնայած զեկույցը պարունակում է սուր քննադատություններ՝ այն նաև արտացոլում է ավելի խորը ռազմավարական մտահոգություն։ Թուրքիայի ԵՄ անդամակցության գործընթացի գրեթե լիակատար խափանումը մնում է գլխավոր խնդիրը։ Եվրախորհրդարանի պատգամավորները ափսոսում են Թուրքիայում օրենքի գերակայության և հիմնարար ազատությունների ոլորտում շարունակական նահանջի համար, որը փաստացի կասեցրել է ԵՄ անդամակցության ուղղությամբ ցանկացած առաջընթաց՝ վերահաստատելով 2023թ. կոչը՝ վերանայել ԵՄ-Թուրքիա հարաբերությունների շրջանակը՝ հնարավորության դեպքում անդամակցության հեռանկարը փոխարինելով փոխադարձաբար գրավիչ և իրատեսական գործընկերությամբ։ Այնուամենայնիվ, այն ընդգծում է, որ այս փոփոխությունը չպետք է խրախուսի ավտոկրատական վարքագիծը կամ ժողովրդավարական արժեքներին չհետևելը:
Հետևեք մեզ տելեգրամում
