Վրաստանի վարչապետ Իրակլի Կոբախիձեն բաց նամակով դիմել է ԱՄՆ նախագահ Դոնալդ Թրամփին և փոխնախագահ Ջեյ Դի Վենսին։ Կոբախիձեն հայտնել է, որ որոշ ժամանակ առաջ նամակ է ուղարկել վերջիններիս վրաց-ամերիկյան հարաբերությունների վերաբերյալ, որոնց հաջորդել են նաև հանրային այլ հայտարարություններ, սակայն մինչ օրս որևէ արձագանք չկա ո՛չ նամակին, ո՛չ հայտարարություններին։
«Այս լռությունը զարմացնում է վրաց ժողովրդին և վրաց կառավարությանը մի քանի պատճառներով․ նախևառաջ, Վրաստանը տարիներ շարունակ եղել է Միացյալ Նահանգների ամենահուսալի գործընկերը մեր ամենաբարդ տարածաշրջանում, որը ռազմավարական նշանակություն ունի Միացյալ Նահանգների համար։ Վրաստանը աջակցում էր Միացյալ Նահանգներին ամենատաք կետերում, այդ թվում՝ Իրաքում և Աֆղանստանում, որտեղ Վրաստանն ուներ մեկ շնչի հաշվով ամենաբարձր զորքերի թիվը։ Միայն այս երկու առաքելություններին մասնակցելով՝ մեր փոքրիկ երկիրը խնայեց 2.5 միլիարդ դոլար, որը մի քանի անգամ ավելի է, քան ԱՄՆ բյուջեից Վրաստանին տրամադրված իրական օգնությունը (մենք իրական օգնության մեջ չենք ներառում ԱՄՆ բյուջեից 2008-11 թվականներին նախկին նախագահ Միխեիլ Սաակաշվիլիի ռեժիմը փրկելու համար հատկացված միջոցները, այն բանից հետո, երբ Սաակաշվիլին Deep State-ի հրամանով պատերազմ սկսեց Ռուսաստանի հետ. մենք նաև իրական օգնության մեջ չենք ներառում ԱՄՆ դեսպանատան, USAID-ի, NED-ի, Սորոսի հիմնադրամի և այլ խողովակներով Վրաստանում արմատականություն և ատելություն հրահրելու, հեղափոխություններ կազմակերպելու, Վրաց ուղղափառ եկեղեցու կերպարը վարկաբեկելու, կրոնական ծայրահեղականությունը խրախուսելու, պետական ինստիտուտները թուլացնելու, գենդերային և ԼԳԲՏ քարոզչություն իրականացնելու և այլ նմանատիպ նպատակներով հատկացված միջոցները)»,- գրված է բաց նամակում։
Նամակում նաև նշվում է, որ տարիներ շարունակ լինելով «ԱՄՆ-ի իսկական ռազմավարական գործընկերը, որը շարունակում է պատրաստակամ լինել ռազմավարական գործընկերությունը շարունակելու համար, զարմացած է ԱՄՆ նոր վարչակազմի լռությունից»։
«Միջազգային վարկանիշների համաձայն՝ Վրաստանը տարածաշրջանում առաջատար է ժողովրդավարության, օրենքի գերակայության, մարդու իրավունքների, լրատվամիջոցների ազատության, դատական համակարգի անկախության, պետական ինստիտուտների ուժի, կոռուպցիայի ցածր մակարդակի և այլ չափանիշների առումով։ Վրաստանի առաջատարությունը հաստատվում է նաև այն հաստատությունների կողմից, որոնց ձեր վարչակազմը հատկապես վստահում է։ Հաշվի առնելով այս ամենը՝ և այն փաստը, որ դուք ակտիվորեն երկխոսության և հաղորդակցության մեջ եք մի շարք նույնիսկ բացահայտ ոչ ժողովրդավարական և ավտորիտար պետությունների հետ, Վրաստանի վերաբերյալ ձեր լռությունը մեզ համար որևէ տրամաբանական բացատրություն չունի»,- գրված է բաց նամակում։
Կոբախիձեն նաև շեշտել է նաև, որ «վրաց ժողովուրդը սկզբում սպասում էր, որ Վրաստանը կդառնա առաջին երկրներից մեկը, որի նկատմամբ ԱՄՆ վարչակազմը կցուցաբերի հատուկ հետաքրքրություն»։ Վրաստանի վարչապետն անդրադարձել է նաև MEGOBARI ACT-ին՝ անվանելով այն թշնամական օրենք վրաց ժողովրդի և վրաց կառավարության նկատմամբ։
«Վրաստանի կառավարությունը համբերատար սպասում է այն պահին, որը պետք է ծառայի որպես վրաց-ամերիկյան հարաբերությունների վերագործարկման և մեր երկրների միջև ռազմավարական գործընկերության վերականգնման հիմք»,- նշված է բաց նամակում։
Հետևեք մեզ տելեգրամում
