Միացյալ Նահանգները խստորեն դատապարտում է Վաշինգտոնում Իսրայելի դեսպանատան երկու աշխատակիցների սպանությունը՝ այս հանցագործությունը համարելով «վախկոտ հակասեմական բռնության անամոթ արարք»։ Այս մասին հայտարարել է ԱՄՆ պետքարտուղար, ԱՄՆ նախագահի ազգային անվտանգության հարցերով օգնականի պաշտոնակատար Մարկո Ռուբիոն։
«Մենք ամենախիստ կերպով դատապարտում ենք Վաշինգտոնում Իսրայելի դեսպանատան երկու աշխատակիցների սպանությունը։ Մեր աղոթքները նրանց հարազատների հետ են։ Սա վախկոտ հակասեմական բռնության անամոթ արարք է։ Վստա՛հ եղեք, մենք կգտնենք մեղավորներին և պատասխանատվության կենթարկենք»,-գրել է Ռուբիոն X սոցիալական ցանցում։
Նշենք, որ մայիսի 21-ի երեկոյան ԱՄՆ-ում Իսրայելի դեսպանատան երկու աշխատակիցներ սպանվել են միջոցառումից հետո, երբ դուրս էին գալիս Վաշինգտոնի հրեական թանգարանից։ Լրատվամիջոցները հաղորդել են, որ դիվանագիտական առաքելության մի քանի այլ աշխատակիցներ վիրավորվել են։
Հետևեք մեզ տելեգրամում
