Թուրքիայի նախագահ Ռեջեփ Թայիփ Էրդողանն Ադրբեջանից վերադառնալիս զրուցել է լրագրողների հետ և անդրադարձել Հայաստան-Ադրբեջան, Հայաստան- Թուրքիա գործընթացներին:
«Գոհունակությամբ ենք ընդունում Ադրբեջանի և Հայաստանի միջև արվող քայլերը։ Խաղաղության պայմանագրի տեքստի հարցում համաձայնության ձեռքբերումը դիտում ենք որպես կարևոր զարգացում կայունության ճանապարհին։ Ցանկանում ենք, որ այս գործընթացն ամենամոտ ժամանակահատվածում ամբողջացվի»։
Էրդողանն անդրադառնալով խաղաղության պայմանագրին, շեշտել է.
«Մենք արդեն Հրվ․ Կովկասում ցանկանում ենք տեսնել ոչ թե հակամարտություն, այլ անդորր և խաղաղություն։ Տարածաշրջանում ապահովվելիք մնայուն խաղաղությունից բոլորն են շահելու։ Մենք գոհ ենք, որ հորիզոնում Ադրբեջանի և Հայաստանի միջև խաղաղություն է երևում։ Այդ գործընթացին մոտիկից ենք հետևում։ Անհրաժեշտ ներդրումն էլ կատարում ենք։ Ապահովվելիք խաղաղությունն Ադրբեջանի, Հայաստանի և մեր երկրի համար ևս արժեքավոր է լինելու։ Մենք էլ Հայաստանի հետ շատ ուշադիր կարգավորման գործընթացով ենք անցնում։ Երբ և՛ խաղաղություն, և՛ կարգավորում ապահովվի, տեսնելու ենք, որ մեր երկրները դրանից շահած են դուրս գալիս։ Այսինքն՝ այս հարցում խոսք չկա անգամ նվազագույն կասկածի մասին։ Զանգեզուրի անցումն Ադրբեջանի համար միայն Նախիջևանի հետ ցամաքային կապ չէ, այլ նաև թյուրքական աշխարհ հասնող նոր ինտեգրացիոն գիծ է։ Այս անցման բացումը կարճ ժամանակում ամրապնդելու է նաև Կովկասում տրանսպորտային և էներգետիկ ենթակառուցվածքը։ Սպասում ենք, որ մեր հարևան Իրանն էլ աջակցի այս քայլերին, որ ծառայելու են մեր տարածաշրջանում անդորրին, խաղաղությանն ու զարգացմանը։ Ճիշտն ասած՝ ցանկանում ենք, որ նրանք էլ այս «շահում են բոլոր կողմերն էլ» (win-win) մթնոլորտում օգուտ ստանան։ Արվող յուրաքանչյուր քայլ, բացվող յուրաքանչյուր դուռ, միջանցք ինչպես տնտեսական օգուտ է ապահովելու, այնպես էլ ժամանակի ընթացքում երկրներին էլ ավելի է մերձեցնելու միմյանց»։
Հետևեք մեզ տելեգրամում
