Լեհաստանի և Ֆրանսիայի դեսպանատների նախազգուշացումները, որով իրենց քաղաքացիներին կոչ են անում հարյուր անգամ մտածել Վրաստան գնալուց առաջ, անհիմն հարձակում են վրացական զբոսաշրջության վրա, որը երկրի տնտեսության հիմնական ոլորտներից մեկն է և ժողովրդի բարգավաճման աղբյուր: Այս մասին իր սոցցանցերի էջում գրել է Վրաստանի խորհրդարանի նախագահ Շալվա Պապուաշվիլին:
«Երեկ Վայմարյան եռանկյան անդամ Լեհաստանի և Ֆրանսիայի դեսպանատները նախազգուշացում տարածեցին իրենց քաղաքացիներին՝ կոչ անելով հարյուր անգամ մտածել Վրաստան գալուց առաջ՝ իբր վրացական սահմանին մուտքի մերժման բազմաթիվ դեպքերի պատճառով: Շատ մտահոգիչ է, որ Վրաստանի քաղաքականության վրա անհաջող հարձակումներից հետո այժմ հարձակումներ են նկատվում նաև երկրի տնտեսության վրա: Զբոսաշրջությունը մեր ժողովրդի բարեկեցության բարելավման կարևոր ոլորտ է, և դրա վրա անարդարացի հարձակումը հարձակում է վրաց ժողովրդի բարեկեցության և մեր ազգային շահերի վրա»,-գրել է խորհրդարանի ղեկավարը։
Նշենք, որ մայիսի 30-ին Լեհաստանի և Ֆրանսիայի դեսպանատները հայտնեցին օտարերկրյա քաղաքացիների՝ Վրաստան մուտք գործելու մերժման դեպքերի աճի մասին, և կոչ արեցին իրենց ուղևորությունները պլանավորելիս հաշվի առնել հնարավոր ռիսկերը: Դիվանագիտական ներկայացուցչությունները նաև նշել են, որ օտարերկրյա քաղաքացիները կարող են տուգանվել Վրաստանում բողոքի ցույցերին մասնակցելու կամ նույնիսկ ենթադրյալ մասնակցության համար:
Հետևեք մեզ տելեգրամում
