Իսրայելի իշխանությունները Սպիտակ տանը վստահեցրել են, որ չեն հարվածի իրանական թիրախներին, մինչև ԱՄՆ նախագահ Դոնալդ Թրամփը հասկացնել չտա, որ Թեհրանի հետ միջուկային ծրագրի շուրջ բանակցությունները ձախողվել են։ Այս մասին հինգշաբթի օրը հայտնել է Axios պորտալը՝ հղում անելով իր աղբյուրներին։
Նրանց խոսքով՝ անցյալ շաբաթ Վաշինգտոն կատարած այցի ժամանակ ռազմավարական պլանավորման նախարար Ռոն Դերմերը, Իսրայելի հետախուզական ծառայության՝ Մոսսադի ղեկավար Դեյվիդ Բարնեան և Իսրայելի Ազգային անվտանգության խորհրդի ղեկավար Ցախի Հանեգբին ամերիկյան իշխանություններին տեղեկացրել են հրեական պետության որոշման մասին։
«Մենք հանգստացրինք ամերիկացիներին և ասացինք, որ եթե հնարավոր լինի լավ դիվանագիտական լուծում գտնել, հարձակում սկսելու մեջ տրամաբանություն չկա։ Հետևաբար, մենք նրանց հնարավորություն կտանք և որևէ ռազմական գործողություն չենք ձեռնարկի, մինչև պարզ չդառնա, որ բանակցությունները սպառել են իրենց, և ԱՄՆ նախագահի դեսպան Սթիվեն Վիտկոֆը հանձնվել է»,-ասել է աղբյուրը։
Թեհրանը, ըստ Իսրայելի, կանի ամեն ինչ, որպեսզի բանակցությունները չձախողվեն։
«Բանակցությունները կարող են տևել ևս մի քանի ամիս, նախքան Թրամփը որոշի, որ դրանք ձախողվել են»,-Axios-ին ասել է աղբյուրը։
Վերջին շաբաթներին Վաշինգտոնի վարչակազմը մտահոգված է, որ Իսրայելը կարող է հարվածել Իրանին, չնայած Թեհրանի միջուկային ծրագրի շուրջ շարունակվող բանակցություններին: ԱՄՆ նախագահն ավելի վաղ հայտարարել էր, որ զգուշացրել է Իսրայելի վարչապետ Բենյամին Նեթանյահուին, որ նման քայլ չձեռնարկի, քանի դեռ բանակցությունները շարունակվում են՝ հավելելով, որ իր դիրքորոշումը «կարող է փոխվել մեկ հեռախոսազրույցի ընթացքում»:
Հետևեք մեզ տելեգրամում
