ԱՄՆ նախագահ Դոնալդ Թրամփն ակնկալում է, որ Վաշինգտոնի և Թեհրանի միջև Իրանի միջուկային ծրագրի շուրջ բանակցությունները կշարունակվեն՝ չնայած Իսրայելի հարվածներին: Այս մասին Fox News-ին ասել է ԱՄՆ առաջնորդը։
«Իրանը չի կարող միջուկային ռումբ ունենալ, և մենք հույս ունենք վերադառնալ բանակցությունների սեղանի շուրջ։ Տեսնենք», – X սոցիալական ցանցում Թրամփի խոսքերն է մեջբերել Fox News-ի լրագրող Ջենիֆեր Գրիֆինը։
Գրառման մեջ նշվում է, որ վերջին օրերին նախագահ Թրամփը մի քանի անգամ խոսել է վարչապետ Նեթանյահուի հետ։
«Նախագահ Թրամփը նախապես տեղյակ էր հարվածներից։ Դա անակնկալ չի եղել, բայց ԱՄՆ-ն ռազմական առումով ներգրավված չէր, և հույս ունի, որ Իրանը կվերադառնա բանակցությունների սեղանի շուրջ», – նշում է լրագրողը։
ԱՄՆ իշխանություններն ակնկալում են, որ բանակցությունների հաջորդ փուլը կկայանա հունիսի 15-ին, ինչպես և նախատեսված է։
Ավելի վաղ Իսրայելի վարչապետ Բենիամին Նեթանյահուն հայտարարել էր «Վեր հառնող առյուծ» գործողության մեկնարկի մասին, որն ուղղված է Իրանի միջուկային ծրագրի դեմ։ Նա զգուշացրել էր, որ հարվածները կշարունակվեն։ Իսրայելի պաշտպանության նախարար Իսրայել Կացը դա անվանել է «կանխարգելիչ հարված» և իր հայրենակիցներին զգուշացրել Իրանի պատասխան հարձակման մասին։
Հետևեք մեզ տելեգրամում
