Ռուսաստանը և Ադրբեջանը պետք է մնան մտերիմ գործընկերներ և դաշնակիցներ, և բոլոր ի հայտ եկող խնդիրները պետք է լուծվեն կառուցողական ճանապարհով։ Այս մասին լրագրողների հետ զրույցում ասել է Ռուսաստանի նախագահի մամուլի քարտուղար Դմիտրի Պեսկովը։
«Մենք շարունակում ենք մնալ կողմնակիցներ և կարծում ենք, որ տրամաբանությունն ասում է միայն մեկ բան՝ Ռուսաստանը և Ադրբեջանը հանդիսանում են և պետք է մնան մտերիմ գործընկերներ, դաշնակիցներ և երկրներ, որոնք միավորված են ընդհանուր պատմությամբ, ընդհանուր ներկայով և ընդհանուր ապագայով», -Պեսկովի խոսքերն է մեջբերում «Ինտերֆաքս» գործակալությունը։
Կրեմլի ներկայացուցիչի խոսքով՝ «բոլոր ի հայտ եկող խնդիրները, անշուշտ, պետք է լուծվեն կառուցողական ճանապարհով, որպեսզի համապատասխանեն մեր երկկողմ հարաբերությունների ընդհանուր ոգուն»։
Պեսկովը նաև ասել է, որ Բաքվում ՌԴ դեսպանատունը և Ռուսաստանի արտաքին գործերի նախարարությունը «մշտական կապի մեջ են ադրբեջանական կողմի հետ և պաշտպանում են ձերբակալված ռուսաստանցիների շահերը՝ օգտագործելով օրենքով և առկա դիվանագիտական գործելակերպով նախատեսված բոլոր հնարավորությունները»։
Նա նաև հիշեցրել է, որ Ռուսաստանի քննչական կոմիտեի և Գլխավոր դատախազության ղեկավարներ Ալեքսանդր Բաստրիկինը և Իգոր Կրասնովը շփումներ են պահպանում Ադրբեջանի գլխավոր դատախազի հետ։
Ռուսաստանի և Ադրբեջանի հարաբերությունները լարվել են Եկատերինբուրգում մի քանի ադրբեջանցիների ձերբակալությունից հետո, որի ընթացքում երկու մարդ էր մահացել։ Ադրբեջանն իր հերթին 4 ամսով կալանավորել է «Sputnik Ադրբեջան» գործակալության ղեկավարին և գլխավոր խմբագրին, ինչպես նաև ՌԴ 8 քաղաքացու՝ վերջիններիս մեղադրելով կազմակերպված հանցավոր խմբավորմանը մասնակցության մեջ։
Հետևեք մեզ տելեգրամում
