Իսրայելը կարող է Գրետա Թունբերգին ահաբեկիչների համար նախատեսված բանտ ուղարկել

Իսրայելի ազգային անվտանգության նախարար Իտամար Բեն-Գվիրը երկրի ղեկավարությանը կտեղեկացնի,որ մտադիր է շվեդ բնապահպան ակտիվիստ Գրետա Թունբերգին տեղավորել Դամոնի կանանց բանտում: Այս մասին օգոստոսի 31-ին հայտնել է «Իսրայել Հայոմ» թերթը։

Կայքի փոխանցմամբ՝ Բեն-Գվիրը վարչապետ Բենյամին Նեթանյահուին կառաջարկի չկրկնել հունիսի սխալները, երբ Իսրայելը «մեղմ» վարվեց «Մադլայն» նավով Գազայի հատվածի ափ մեկնող ակտիվիստների հետ։ Այժմ, ինչպես հաղորդում է թերթը, խոսքը տղամարդկանց Կիցիոտ բանտում, իսկ կանանց՝ Դամոն բանտում տեղավորելու մասին է, որտեղ պայմաններն ավելի խիստ են, քան սովորական բանտերում։

Ազգային անվտանգության նախարարը նաև մտադիր է հրամայել առգրավել այն նավերը, որոնցով կժամանեն ակտիվիստները, և դրանք օգտագործել ոստիկանական նպատակներով։ «Իսրայել Հայոմ»-ը ընդգծել է, որ Իսրայելի դատարանն արդեն հաստատել է հնարավոր բռնագրավումը։

Հունիսին Թունբերգն արդեն փորձել է մտնել Գազայի հատված «Մադլայն» նավով։ Հունիսի 9-ին Իսրայելի ռազմածովային հատուկ նշանակության ուժերը գրավել են նավը։ Ավելի ուշ ձերբակալված պաղեստինամետ ակտիվիստները տեղավորվել են անօրինական ներգաղթյալների համար նախատեսված կալանավայրում։ Հունիսի 10-ին Թունբերգը արտաքսվել է Ֆրանսիա։