Ստեփանակերտում հողին է հավասարեցվում Արցախի ԱԳՆ-ի շենքը: Այդ մասին սոցցանցում գրառում է արել Արցախի մշակութային ժառանգության հարցերով օմբուդսմեն Հովիկ Ավանեսովը։
«Այսօր, երբ նշվում է Արցախի անկախության օրը, Ադրբեջանը կրկին ցուցադրում է իր իրական դեմքը, բռնապետական վարչակարգի հրահանգով ժամանակավորապես բռնազավթված Ստեփանակերտում ծանր շինարարական տեխնիկայի միջոցով հողին է հավասարեցվում Արցախի արտաքին գործերի նախարարության շենքը։ Սա ոչ միայն հերթական դաժան հարվածն է Արցախի պետականությանը, այլև դիտավորյալ ջնջում են պետականության խորհրդանշական արժեքները։ Նույն ճակատագրին արդեն իսկ արժանացել են Արցախի Ազգային ժողովի շենքը և տասնյակ այլ կառույցներ, որոնք այսօր Ադրբեջանի նպատակային քաղաքականության զոհն են»,-գրել է Ավանեսովը։
Օմբուդսմենի նշմամբ՝ Արցախի հայկական մշակութային ու պատմական ժառանգությունը կանգնած է համակարգված ոչնչացման վտանգի առաջ։ Բաքուն հետևողականորեն իրականացնում է քաղաքականություն, որի նպատակն է ջնջել հայկական ներկայության բոլոր հետքերը Արցախում՝ այն վերածելով պատմական կեղծիքի և մշակութային դատարկության տարածքի։
«Սա ոչ միայն հայկական ժառանգության, այլև համամարդկային արժեքների դեմ ուղղված հանցագործություն է»,-նշել է նա։
Ադրբեջանական լրատվամիջոցները հայտնում են, որ «ապամոնտաժման աշխատանքների մեկնարկի ամսաթիվը խորհրդանշական է և այդ շենքի տեղում մտադիր են ճարտարապետության և քաղաքաշինական վարչության շենք կառուցել։
Հետևեք մեզ տելեգրամում
