Մակրոնը պաշտպանության նախարարին նշանակել է վարչապետի պաշտոնում

Ֆրանսիայի նախագահ Էմանուել Մակրոնը պաշտպանության նախարար և իր դաշնակից Սեբաստիան Լեկորնյուին նշանակել է վարչապետ՝ Ֆրանսիայի Ազգային ժողովի կողմից Ֆրանսուա Բայրուի կառավարությանը անվստահության քվե հայտնելուց մեկ օր անց։

Ելիսեյան պալատից հայտնել են, որ 39-ամյա քաղաքական գործչին հանձնարարվել է խորհրդակցել խորհրդարանի կուսակցությունների հետ՝ բյուջեի շուրջ համաձայնության հասնելու համար։ Դրանից հետո Լեկորնյուն պետք է նախագահին առաջարկի նոր կաբինետի կազմը։

Նոր կառավարության ղեկավարը պետք է հնարավորինս շուտ ապահովի երկրի 2026 թվականի բյուջեի հաստատումը Ազգային ժողովի կողմից և լուծի նախկին վարչապետ Բայրուի հրաժարականի հանգեցրած վեճը։

Մակրոնը երկու տարվա մեջ արդեն 5-րդ անգամն է, որ ստիպված է նշանակել նոր վարչապետ։ Այս անգամ ևս նա հրաժարվեց կառավարության ձևավորումը վստահել ձախակողմյան կուսակցություններին։